在都市做耕種人
【圖、文／黃美貞／台北市光復國小教師】
發音人：黃美貞（南四縣腔）
早期个農業社會，畜豬仔就在屋側角搭个豬欄，田坵挖一隻大窟仔就做魚塘，老輩人講：屙屎搭掘芋仔，一來做得賺外水，二來又添兜肉氣。時代進步哩！科技化个農業變成日常生活个一部分，比將講：電子豬、魚菜共生，就算歇在都市，乜做得享受做莊下人个快樂。
汁水係每一個家庭都有个產物，自家開火愛削皮、擇菜，買便个飯菜乜有食伸个菜尾、骨頭，這兜全部做得分類，另外用桶仔裝好勢，分垃圾車收走，毋過，垃圾車無日日來，或者時間無堵好，僅可囤在屋下，天時係翕熱，斯烏蠅拑烏蠅啄，實在當得人惱。
有一日，亻厓在後尾仔看著一臺像洗衫機个機器，行兼一看，原來係阿哥新買个電子豬，做得將廚餘變成泥肥，拿去種花種菜就做得。有環保觀念个阿哥識歇在美國幾下年，非常認同美國人个廚餘處理方式，直接鬥一臺機器在水槽仔下背，廚餘攪到綿綿就排到下水道，轉來臺灣尋著做得做肥料个電子豬，雖然較麻煩兜仔，毋過做得廢物利用，做出健康又淨俐个肥料，種出靚靚个一片花園，實在當湛斗。
種菜合畜魚仔乜做得，簡單講就係魚菜共生，魚箱仔座底，菜箱仔座面頂，魚箱仔个垃圾水抽上去種菜，菜又將垃圾水變淨水，流到轉去分魚仔用，恁樣魚箱仔水變淨了，菜又吸收到水肚个養分，毋單淨做得避免水質變差，還會變成魚仔𢯭手菜、菜𢯭手魚仔个自然系統，大體來講，係畜福壽魚、錦鯉較多，魚仔留來看靚，菜做得緊生緊割，連細人仔就做得做菜園，食起來還特別清甜。
頭擺个生活雖然艱苦，毋過心肝肚總係有淰淰个希望，就像老古人講个，窮人毋使多，兩斗米會唱歌。現代人物質豐湧，生活壓力顛倒較大，有閒時節，衫袖仔攝起來種菜畜魚仔，心情無定就會天轉笠嫲花哦！
