唐人街同泗水廟宇
【文、圖／江卓安／客家語文碩士班一年級】
今晡日係來到印尼个第四日，亻厓兜去泗水个唐人街，該名安到「kya kya」就係福佬話个「行行」，亻厓兜發現這位个唐人街還係同臺灣个社會共樣，係福佬人較多，客家人較少，這條街還像都尋無客家人个蹤跡，除忒去了kya kya唐人街以外，亻厓兜還去了兩隻廟，係講起這兩隻廟，就有當多好講了哦，這兩隻廟保留个古老程度，可能比臺灣還較好。
第一隻廟係在惠潮嘉會館隔壁條街个媽祖婆廟，該安到「福安宮」，該一聽名仔，就會知這廟就係福建人起个，裡背肚个阿姨正經係福建人，毋過佢毋會講福建話，佢會小可个華語定定。這位盡熱，因為這位个蠟燭盡多，細細隻个蠟燭有幾下十公分，毋過大大隻个，都比人還大隻，該蠟燭還燒等，故所在該裡背肚會有一種「滿頭大汗」个感覺。這間廟特別个地方就係，這間廟有藥籤，係人發病時節做得求个藥籤，做得去漢藥店拈藥仔來食。這係第一間廟。
第二間廟係拜玄天上帝个，安到北極廟，這位乜有藥籤，做得同大家分享个係，這間北極廟有客家人，裡背肚个阿姨阿叔都係講客家話，佢兜係梅縣來个，故所講客家話做得通。
這兩間廟裡肚，亻厓發現一息仔特別个地方，就係這藥籤差毋多有百零隻籤，故所這位个籤詩會平均分人拿忒、拿淨正係，毋過這兩間廟總係有兩三隻格仔裡背肚本來就無籤，實在還奇怪，毋過經過自家个揣想，這可能係當初設計這藥籤个人自家設計个，因為在其他个藥籤系統裡背，有「空籤」這隻選項，僅會用修持、勸化這種个驚世詩文來講分你聽。可能因為在印尼恁樣个勸化型態个「空籤」會分人試着毋適當，可能就同佢放空來，這意思就係講啊，你發病愛求藥籤，這位係空籤，就係愛你定定仔來觀察，毋好忒急，這病就交分時間處理，自然會好，恁樣个意思。毋過啊，做麼个藥籤會緊來緊失落，這就係啊因為醫術个進步，有西藥了，做得藥到病除，毋使過透過神明个意思食漢藥來慢慢調養身體，故所藥籤个信仰正會緊來緊失落。毋過亻厓這位个阿姨講，求着个藥籤，就近仔都有漢藥店做得抓藥，所以還係做得相信藥籤个，毋過發現事情大條个話，還係去分先生看較好哦。
