毋係行自家个路
【文／鍾榮富／南臺科技大學應用英語系講座教授】
發音人：鍾榮富（南四縣腔）
今年大專學生組作文題目係「行自家个路」。這個題目非常適合現下个後生仔，目前大多數个大學生，多多少少都會有自家个想法，自家个夢想。毋知對麼个時節開始，社會上漸漸喊出「行自家个路」个口號，影響了後生一輩个想法同看法。對四年生上大學該時(八零年代)來講，這係無可能想像个口號。當時个亻厓，連頭前有麼个路都毋知得，大部分人都係跈等阿爸、親戚、先生規劃个路去行。
由於生活困苦，吾爸希望盡早減輕家庭負擔，故所高中愛畢業个時，亻厓就選擇高雄師範學院。又因為英文有較多機會補習，故所就選了英文系來讀。就恁樣，一路行過八零年代个大學生活，並無麼个後悔、難過。期間，最感歡喜个就係對大一開始到畢業，每學期都有兩到三个家教，維持生活，還做得寄兜零用錢歸屋下。一路里來，這兜家教學生同家長變成亻厓个好朋友。
畢業以後，分發到盡鄉下个國中，教了一年書，還吂前知得愛仰仔教，就入營做兵。亻厓做个係陸戰隊，每禮拜日放假就去尋高師大个美國先生Robert Poole尞，陪佢去市場買菜，同佢講話，練習英語。佢同亻厓約好，每禮拜三以前寄分佢一篇英文作文，見面該時，先同佢共下食咖啡，聽佢講有个毋个，差毋多一點鐘後，佢開始改作文，毋單止講出篇章結構、句子結構个問題，還愛講美國人通常會仰仔寫。在陸戰隊將近兩年个時間，讓亻厓个英文寫作、閱讀、同口語都有實質上个大進步。
退伍後，考入屏東女中擔任教員。為了多賺把錢，下課以後就去補習班兼課，同時去觀摩名師个教學方法。無想着，一下仔就兼到下港有名聲，對嘉義以南，有名个補習班都愛亻厓去掛名。名聲驚著校長，正停下亻厓个江湖生涯。
有一年，屏女招生个考題出了問題，有補習班去檢舉，一大堆記者衝入校門，愛尋人解釋試題。校長這尋該尋，都無人愛出面解題，一下看着亻厓在辦公室看報紙，校長就來問亻厓做得同佢𢯭手無。該央時，亻厓係新人，本來無敢出聲，既然校長來問，亻厓同佢講愛分亻厓十分鐘。轉手歸去單身宿舍，儘採拿了十過本英文文法書去開記者會。記者个問題，每一條亻厓都拿出文法書證明試題無毋著。經過三十零分鐘个來回問答，記者會圓滿結束。
這下回想這兜事情，全都係過往煙雲，毋過點點滴滴在心頭，實在講該當時無辦法選擇自家个路。既然頭前有路好行，就恬恬仔行，行到今，總講行過个都毋係自家个路。
