好命狗
【文、圖／黃美貞／臺北市光復國小教師】
發音人：黃美貞（四縣腔）
現下个人畜狗仔、貓仔來做伴，係當普遍个現象，將佢兜準自家个細孲共樣，惜到命肝仔樣仔，打扮到靚靚，出門用車仔𢱤，連訃聞頂項就識看着落名，這種情份就像屋下人，難怪安到「毛細人仔」，摎這兜細動物有關係个事業，乜緊來緊多哩！
現大部分歇在都市个細人仔，都會想畜一隻細動物，做得帶佢去散步，做得同佢講細話仔，吾倈仔－細胖仔逐擺看着認養个公告，鴨嫲嘴就罔吮：「阿姆，𫣆兜來畜一隻狗仔，好無？」亻厓講：「都市个屋仔狹蹶蹶仔，毋比得莊下天闊地闊，狗仔貓仔跈等𫣆兜係受罪，莫較贏那！」毋當另日有時間去姐公屋下，好好來同阿公个狗仔搞，久久仔看一擺，大家就親暱暱仔，加異生趣！
國中會考一結束，細胖仔用平時長著个私伽錢，買幾下包狗仔个零嗒，準備好好招待姐公屋下个狗伴仔。狗食个包裝當精緻，頂項無特別標記，乜無狗仔个相片，同名店个肉乾外表，無麼个爭差，無認真看會恅着係人食个。大哥一旦就當好食肉乾，坐啊下來，電視一開，看著該包肉乾就打開來食，食忒一垤試着怪怪，開聲問細胖仔：「這肉乾麼人買个，食起來淡濫淡濫？」吂知，脣項个三哥、老弟續等講：「係哦！無味無緒个肉乾哪好食？」細胖仔兩粒目珠盯盯，看等厥舅講：「阿舅，這係狗仔个肉乾，毋係買分你兜食个，你仰恁豺呢？」大家聽著就㖸壞哩！
又有一日，看著報紙有一篇訃聞，仰會有「毛孫」這種稱謂？還有名有姓，後來去網路一查，正知得，原來當多人無降細人仔，畜个狗倈仔、狗妹仔就像自家个子女，去外背餐廳食飯，愛挑挑選友善餐廳，狗仔在桌下自由行動，主人做得放勢仔打嘴鼓；平常有基本个洗身、美容，係有燒有冷，愛遽遽帶去動物病院，無健康保險全部自費；定期有狗仔个打鬥敘，三不二時帶佢兜去交朋友，正毋會暮固忒，主人係出差，還愛送去專門个旅館，一抹煞就比照渡細人仔个規矩，愐着這，實在係吾常識不足啊！
都市个狗仔食好著好，毋過日日就分人跼等，等主人轉屋正有伴，正有自由；莊下个狗仔大體仔就食兩餐，還愛掌屋打老鼠，無一時閒，但係有闊野野个所在好尞，算來，哪位个狗仔較好命，就看各人个想法了！。
1、 私伽錢：音siiˊkiaˊqienˇ；私房錢。
2、 恁豺：音anˋsaiˇ； 很饞。
3、 訃聞：音fu vunˇ；報告喪事的文字通知。
4、大體：音tai tiˋ；大致、概略。
