轉屋下該條路
【文、圖／張瑞珍／新北市中正國小客語兼任教師、退休教師】
發音人：張瑞珍（海陸腔）
青山綠水好風光，山前山後百花香，亻厓就係戴在恁靚个所在，大山腳下个伙房屋， 所以去街路買菜摎日用品係大人个大事情，因為該條路愛行差毋多歸點鐘，見擺阿爸、阿公從街路轉來，𫣆俚愛用面盆兜洗面水摎兜茶分大人食，毋過𫣆俚搶等做這兜事情，因為有糖仔好食，成下阿爸、阿姆會分俚跈等去街路，該一定係考試考一百分，抑係表現好分大人阿腦正有个。
在亻厓个腦膈肚中有幾擺跈等大人去街路分亻厓印象當深，記得有一擺考試考着一百分，阿姆當暢摎亻厓講:「韶早帶你去食粄條，毋好摎別儕講，斯妳正有哦！」第二日，阿姆該起硬膘个大手牽等亻厓个細手，一路上一直阿𧩣亻厓:「𫣆俚屋下仰會有恁慶个細人仔，恁會讀書，茅寮也會出狀元哦！你下二擺一定會有大發展!」該當時斯像有一條燒暖个電流從阿姆个手傳到亻厓心肝肚，亻厓暢到耐毋得，該碗粄條也係世界上最香最好食个粄條，行在轉屋下該條路，亻厓看着自家光明个未來。
還有一擺阿公帶亻厓去𫣆俚看戲，在路項阿公係看到路中央有石牯抑係樹椏，阿公會跍下去撿開，亻厓問阿公講:「阿公你恁無閒做麼个？𫣆在脣頭行過就好啦!」阿公講：「有錢做功德，無錢乜做得撿開竻啊! 順手撿開分老人家毋好徑著，做人隨時愛想著別儕。」這也係難怪阿公做里長二十零年，村肚哪家辦好壞事一定會邀請阿公坐上橫頭。見擺看煞戲，一路項阿公會摎亻厓講戲肚个情節，裡背肚有盡多忠義、賢孝个故事，分亻厓當多啟示。老古人講：「看戲愛知戲文大意，做人愛識人情義理。」客家大戲裡背教會𫣆盡多做人个道理。
阿爸係亻厓了解植物知識个先生，轉屋下該條路脣係一垤垤个水果園，種有各種个水果，有朳仔、柑仔、柿仔、水梨摎橄欖，有兜係𫣆俚个，有兜係別儕个，阿爸一定會先去自家園肚巡一輪，阿爸教亻厓看哪兜朳仔熟咧做得摘來食，阿爸也會教亻厓仰般做水柿，仰般分紅柿較遽紅軟來，見擺行轉屋下，頭那肚也裝淰學問轉來。
這條轉屋下个路係亻厓建立自信个路，係亻厓學做人个路，也係亻厓增長知識个路， 更係亻厓摎屋下人感情交流个路。
(拍攝於新竹縣新埔鎮旱坑里)
(拍攝於新竹縣新埔鎮旱坑里老家旁的小徑)
我的老家就是在這座大山腳下的紅瓦三合院，若要上學或大人要去買日用品，一定要從屋前的小路走上大馬路，再沿著馬路走到街上，或去上學，來回約需2個小時。
老家旁的小徑是從大馬路下來回家的一段路，靠近河邊，從小和兄妹們玩耍、捉迷藏的快樂天堂，如今已經改造成汽車可以駛入的小馬路了。
(拍攝於新竹縣新埔鎮旱坑里回老家旁的另一條小徑)
這是回老家的另一條小徑，汽車可以駛入，在這條路上住了幾戶鄰居，也是我們踏青串門子的好地方，更是農忙時可以相互換工的好鄰居。
