做天旱
【文、圖／彭欽清／國立政治大學退休教授】
發音人：彭欽清（四縣腔）
舊年熱天過後，中南部个雨水當少，尤其係南部，新聞播導講新竹以南个水庫總下就渴渴。
自古以來，世間人都為著爭水冤家泌背，因為人無水會渴死，無法度耕種就無好收成會餓死，做得講水就係人个血。
民國四十四年，堵好閏三月，亻厓還讀國小六年級，桃竹苗地區做大天旱，頭一年翻耩仔割忒過後雨水就少，年過後，雨緊來緊少，到了三、四月仔嗄斷點雨。河壩水緊來緊溓。
到尾項，大圳个水愛流毋流樣仔，上圳㧡無水食，下圳無水好洗湯。水，愛去到河壩該㧡正有，衫褲這兜乜愛擐去河壩項洗。
去伯公下對面个伯公潭有石碫仔好行，毋過愛行好遠仔个田脣路，還愛下䃗崁，又再過行好遠仔个河埔正到得潭脣。平常熱天大家洗身仔个大潭，溓到伸一細窟仔水，用細杓嫲定定仔舀到水桶肚，細心細意定定仔行往轉，歸路仔就驚水會激出來打爽忒。
無就愛去水道頭圳脣下个泉水窟，乜係平常熱天大家搞水个大潭，水比伯公潭較多。愛對峎頂行到水道頭圳脣漀往下，崎好竳仔，平常無麼有人行，又係泥路，上下崎腳趾愛揕等，去較正，轉就已罅咈。
無做大旱該下，去大圳㧡一擔水成十分仔就過榨得，㧡六轉水乜正成點鐘仔，這下去河壩㧡一擔水就愛點過鐘。又熱𤐰𤐰仔，嘴當燥水乜毋敢食多。歸屋下人省下來个水，愛留來炆豬菜分豬仔食、洗豬欄，年冬恁壞，就望豬仔遽遽大做得賣來做救命錢。
圳水恁細，禾仔還係愛蔭水，無會割無食，就愛輪水鬮，比論講輪著上坪到山林管理所、八寮灣、水尾坪恁大份个田，在水道頭就會同圳水頓到這條細圳仔，等蔭到差毋多吔正旱忒，分圳水流往下，流到蠶業改良場个桑仔園脣，有水汴頭，扳轉左手析，水會流到國小後背過改良場頭前該份田，扳轉右手析，水又流往下蔭國小頭前到街脣个田。較好額个人還會請人打井抽水來蔭。
水關係著禾仔割有好食無，故所會有人偷放水，輪著蔭水个人會去掌水。聽吾姆講，有人偷放水分人捉著起齬齖，分對方一钁頭柄打死。
有經濟學家講這下當多國家為著爭汽油來戰爭，將來人類會為著爭水相㓾。較先進个國家就發展太空科學，去月球、火星這兜外太空探看啊有水無，係有，人就有可能做得歇在該，毋過這種講天缺个想法毋知愛加幾久仔正做得著。
盡實際个做法係，逐儕就愛了解地球暖化个嚴重性，毋好麼个東西就耗爽到忒無款無僭，好分亻恩个後代做得在地球項歇到長長久久。
