六堆係亻厓屋下
【圖、文／徐佳妤／臺北市客語支援教師】
發音人：徐佳妤（南四縣腔）
「……六堆係亻厓屋下，亻厓个故鄉係在這，靚靚个伙房，深深个文化，還有忠義个精神。」
「六堆係亻厓屋下」係舊年第五十七屆六堆運動會个大會歌，乜係傅也鳴先生創作个。「客家本色」做得講係客家个國歌，這首「六堆係亻厓屋下」乜共樣好聽，因為歌仔融合客家同原住民个元素，尤其對係麟洛人个亻厓來講，聽核蓋感動！上擺个六堆運動大會在竹田舉辦，大約有五千人參加，毋單淨係南部，北部个客家選手也共下來鬥鬧熱，透過運動比賽來團結客家人，這意義重大。
幾下年前，倈仔讀小學四年生，亻厓在校門堵著倈仔个客語先生就同佢譫誃，佢講：「……係大箍kieuˊ，毋係大箍koˊ哦。」該時，亻厓還毋係客語先生，分該先生恁吔指正，自家嗄試著蓋見笑，亻厓，仰講毋著吔？歸去屋下問爺哀，吾屋下確實講「大箍koˊ」無毋著啊？心肚个疑狐一直到成為客語先生，亻厓正知，原來南北四縣有恁大个無共樣啊！
四年前，亻厓參加「講客廣播電台」廣播人員个培訓，最尾每一組愛錄一段廣播節目。下課在等公車个時節，有一個先生同亻厓講：「亻厓等該組有一個學員，佢講亻厓个客無標準，毋過亻厓從細到大，世大人都係恁吔講啊！」詳細一問，原來該先生係高樹人。
舊年个本土語言競賽，一間學校選手个家長，堅持愛厥妹仔用南四縣腔去比，「阿鈺个阿姆，你正經愛若妹仔用南四縣腔去比?亻厓驚怕有兜評審先生會試著選手念毋著，可能會影響分數，你做得無?」「毋怕，亻厓就愛分大家聽著南四縣腔。」因為家長這一句話，嗄分自家蓋感動！也係亻厓在臺北市做吔六年零个支援先生，「新娘上轎──頭一擺」用南四縣腔訓練選手。
這下回想這兜事，感覺著亻厓等毋單淨愛傳承客話，面對無共樣个腔調，定著愛用包容、尊重、謙虛个心去了解，正做得尋轉客家人个凝聚力，化解誤會。自家期待也相信，會有這一日个到來。
