0201成果發表十五冥
【圖、文／江卓安／國立中央大學客家語文碩士班】
這係到泗水个第二日了，有盡多還係適應毋過來个位所，係講問哪位毋適應，就係天時。頭擺人講：「春風後哀面，講變就變。」就係這春天个時節天時乍暖還寒，分人反應毋過來。這種情況到了泗水就係講啊：「印尼天時嬰兒心，有時日頭高高掛天頂，有時多雲落大雨，無遮失望會痛心。」還有一點就係泗水个天時還較翕，時常汗流脈落。
今晡日第一站就係參觀這擺客家學院个合作學校：佩特拉基督教大學，大家第一擺互相見到面，實在還歡喜，還共下參觀了大學裡肚。離開佩特拉基督教大學就係去了中央大學同學盡期待个九龍酒家，大家就來去該位所同印尼个客家好朋友、客家鄉親來紹介臺灣客家个特別。桂婷紹介臺灣客家源流、脩閔同韻竹紹介了盤花、亦謙紹介了豆腐乳、曉菁這組做紅粄過發粄、昱寧這組做了鹹擂茶還過甜擂茶，分第一擺食著鹹擂茶个卓安試著毋會差，食起來還像菜湯，最尾就係自家這組，紹介了客家音樂，亻厓紹介了客家山歌，還表演一段分大家聽，巧昀紹介現代客家音樂，就有當多條做得同巧昀合唱來帶動氣氛，實在還鬧熱，最尾亻厓兜學生還過印尼个學生都還上臺演唱月亮代表我的心，底下還有其他姊姊教亻厓兜跳排舞，實在跳著還樂暢。
酒家个下一站，大家來到泗水个客家大本營，就係「惠潮嘉會館」，對名仔來看就係三隻位所个客家人个會館，惠州个海陸客、潮州个潮州客還過嘉應州个梅州客，會館裡背肚古色古香，有當多在臺灣看毋著个廟宇建築，人講个「勾心鬥角」就係恁樣喔，毋過在這片，還像無看著惠州客家人个身影，大體都係梅縣客過大埔客，希望做得尋著泗水个惠州客家人。去了惠潮嘉會館以後，又去了古氏宗親會，去分該位个阿叔阿姨「餵食」，食了客家个芋粄、炸圓、炸甜粄，有兜同臺灣客家已相同，乜有已多係這位南洋客家个特色，在這有一種東西係安到「十五冥」，這係客家个料理哦，當有印尼个風味，有當重个香茅味，裡背肚就放盡多好料个，朝晨頭飯店个朝食十五冥，到九龍酒家乜有十五冥，可以知得這料理正經盡客家哦！希望做得學著這料理，帶轉臺灣同大家分享。
