楊梅營盤腳古屋長樂客
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
楊梅區上田里營盤腳个古屋（圖1），來自頭擺个廣東省嘉應州長樂縣鯉魚江高車子（這下个梅州市五華縣安流鎮里江村）。本來講長樂客話，毋過來到楊梅這海陸人較多个所在，長久以來，這下全部變講海陸咧！
圖1 楊梅區上田里營盤腳7號个古屋新公廳，堂號安到「新安堂」，民國96年完成。
（古永智先生提供）
來台祖27世達先公，康熙29（1691）年出世。在十七歲个時節，也就係康熙46（1708）年來臺灣，從竹塹上陸，先在竹塹同人做長年。結婚過後，降聲文、聲俊兩個倈仔。後來聲文毋知去向，由族譜記載，佢第二个倈仔聲俊公在乾隆8（1741）年出世來看，達先公在竹塹做長年做欸會三十年，大約到四十大零歲正討康熙58（1720）年出世，少佢二十八歲个洪孺人做餔娘。
第二代聲俊公討林孺人，降錦龍、錦麟兩個倈仔。後來聲俊公帶等兩個倈仔，來到本區長岡嶺（這下个三湖、四湖）一搭仔開發。因為長岡嶺地勢高岡，風吹牛鼻頭，無河壩抑係坑水好蔭田，愛開圳作陂，過加泥油當薄，收成毋好，後來正到營盤腳這田心仔（這下个上田里）開墾。
79年出版个《楊梅鎮志》引用洪敏麟73年出版个《台灣舊地名之沿革》講：「楊梅地方之拓墾，以康熙47（西元1709）年，客籍五華人古揚基（一作古安光）、古厚基、古尾基三兄弟入墾長岡嶺為嚆矢。當年移墾之路線，是由竹塹北上，進入長岡嶺（分屬三湖里、上湖里）一帶開發。康熙51（西元1713）年，古達光又在社子溪（當時稱大溪墘）東邊開拓上田心仔。」這段可能有問題。
根據古姓族譜記載，達先公過身過後葬到大湖口楊喜窩（客話原稱「羊屎窩」），餔娘洪孺人葬到新竹城東十八尖山下，第二代聲俊公也葬到十八尖山下，毋過餔娘林氏在嘉慶25（1819）年過身，就葬到這下祖屋前个禾裎崗來看：「大湖口羊屎窩當兼長岡嶺，古屋人來開發長岡嶺係有可能个，第二代到這下位所應該無問題。康熙47年，達先公正來到新竹定定，洪敏麟係毋係誤寫來到楊梅？同古達先誤寫到古達光（抑係古安光）？聲俊公三子爺誤寫到三兄弟？」根據受訪人古永智先生講：「以第二代聲俊公在乾隆8（1741）年出世，乾隆60（1793）年五十三歲過身，厥倈仔錦麟公乾隆40（1773）年出世來看，祖先來長岡嶺過後，大約在乾隆中期正來到營盤腳開發，係講大量開發，大約乜在乾隆後期，來台第三代錦龍、錦麟个時代吔！」
第三代錦龍公降八個倈仔，錦麟公降兩個倈仔，也就係講，到來台第4代30世，總下就有10房人，算異大家族吔！佢兜係「兄弟合作、煞猛打拚」，毋係「兄弟登山，各自努力」，在恁多人手之下，開發到當闊个田，大約有歸百甲吔。毋過因為忒闊，就將「田寮仔」這一搭仔个田，放分溫姓這兜佃農耕，一直到臺灣光復過後，實行耕者有其田政策過後，土地正減少。
一般廣東來个客人，差毋多係第14～16世來台較多，大約係從南宋末年到元朝初年開粵第1世算起。楊梅古屋來台係27世，仰會差恁多呢？根據族譜記載，原來佢兜始祖第1世係從雲應公在唐德宗時擔任洪州通判開始算起，正同人無共樣。最出名个係傳到宋朝11世革、菫、鞏三公，在宋哲宗紹聖4年「一榜同懷三進士，四傳宗祠兩鄉賢」，傳為佳話。（圖2、3）
圖2、3 古屋祖先11世「一榜同懷三進士，四傳宗祠兩鄉賢」个光榮歷史，為後嗣个典範。
來到楊梅上田心仔發展到恁成功，客人盡重要个係起公廳團結家族。公廳管理人古增坤先生講：「頭擺个公廳較簡單，無這下起過个恁派頭，毋過因為人多有上橫屋、下橫屋。這下起過个新公廳，丑山未向，係民國94年改建，經過兩年，在96年完成个（圖1）。照原來个樣仔，祖先牌位仰般擺就仰般擺，毋敢儘採改，天公爐以前就有，也有天神爺。柱楯都刻等祖先个來歷，請有名个彩畫師張偉能先生來彩繪。」照恁樣來看，古屋有幾隻特點，祖堂中央有觀音神像神位，老弟錦麟公坐龍片大位，除忒有客人傳統个天神爺神位，還有天公爐，另外當多彩繪。」（圖5、6）
圖4 公廳祖先牌位擺放情形，錦麟公派下在左片，錦龍公派下在右片（2023.01.17拍攝）
圖5 公廳彩繪之一幅（2023.01.17拍攝）
公廳前禾埕龍片無幾遠个祖塔，也在民國85年完成，將散在各地个祖公、祖婆骨骸移來葬到共下。（圖6）
圖6 楊梅營盤腳古屋祖塔（2023.01.17拍攝）
長樂（五華）古姓三兄弟來開發楊梅，係另外一派人，佢兜較慢來，目前在長岡嶺一搭仔。根據過身欸个古國順教授講：「祖公慶雲、祥雲、壽雲三兄弟，在道光年間，從長樂過海來臺灣。在淡水登陸，捩來捩去，盡尾來到小楊梅落腳，慶雲無討，老弟祥雲將第二个倈仔頂分大哥承香煙，佢兜後代搬到南投埔里去發展。自家个阿太壽雲公降兩个倈仔留到楊梅。阿公早死，大約到甲午戰爭前，阿爸細細時節正跈伯公徙到長岡嶺三湖、四湖一搭仔贌田耕。」這下還在三湖三元宮前个厥二哥古國堂先生也識講：「祖公來台忒慢，無地好開墾，識去田心仔偎靠早來个共鄉古屋人，毋過盡尾還係靠自家絡食，故所貧窮無起公廳，祖塔在富岡國小脣項。」故所，這兩個姓古長樂客無共來台祖，來台時代也無共樣，一個頭擺開墾過長岡嶺，一個這下在長岡嶺。
這下楊梅古屋後代當多，雖然還當多在本地桃園，毋過出外到臺灣北部、南部、新竹，甚至花東、海外个也不少。
（本文个完成，愛感謝錦龍公派下34代古增坤先生，錦麟公派下36代古永智先生，提供族譜資料、公廳導覽解說（圖7），還有壽雲公派下古國堂、古國順先生。）
圖7 在古屋公廳祖先牌位前合影，左起筆者、古增坤先生、古永智先生（2023.01.17林芊慧攝影）
※本文的「介」為大眾通用的「的」，同教育部訂的「个」之意。
