銃打出頭鳥 水淋出頭椽
【圖／廖千慧；文／何石松】
發音人：何石松（海陸腔）
銃打出頭鳥，水淋出頭椽，意思係講該相爭比背，總想愛飛在鳥群面前，或者摎頭那探出鳥竇介鳥仔，不管佢介想法仰般，係盡容易斯會分人銃仔打死介對象；共樣，該老屋超出屋簷介椽仔，又安到跳手，分該長年透天介風吹日炙，雨淋霜打，水淋水涿，七早八早就會蛀忒歿忒咧，但是，該屋肚介，還萋頭到會發光！
這雖然係一種自然現象，也可以反映到人事介參考。裡背就暗示吾俚，做人愛穩重，毋好滿哪仔去展自家介聰明，其實早就分人看毋順眼，自家還嘴勺勺全毋知，本來，佢介內心係愛發揚正義，犧牲自家，成全大局，盡忠為主介精神，頭弄弄魯等去，無煩勞別儕係麼介想法，結果無顧著全局，無意無思命嗄無忒，實在分人痛惜啊！所以這句諺語，係教精吾俚，愛知得儆惜自家，謹慎謙虛，不敢為天下先，也愛體會「木秀於林，大風必摧」介道理，留下有用人生，可能也還可以做出儘多介聲勢，也無一定。
出頭介鳥仔，隨時有分人打死介危險；出頭介椽仔，因為長年透天身在牆外，早斯分該霜風雪水，烈日狂風打到頭斷身屈，歿歿酥酥。其實，人間也有儘多無形介出頭鳥摎出頭椽，想起來也已艱苦。記得頭擺讀書，讀到《世說新語》裡肚曹操摎楊脩去揣曹娥碑石後背，該八隻字介令仔。楊脩一看，就知係「絕妙好辤」介意思，曹操還愛行咧三十里以後，正揣著。大家都安腦講楊脩才思敏捷，聰明過人，實在了不起。先生也講，楊脩比曹操聰明，不過，聰明係聰明，無想著，聰明反分聰明誤，顛倒還較死，唯我獨尊介霸王曹操，表面安腦你，仰忍得核眼前這座大山，所謂「人前手牽手，後背下毒手。」驚怕早就埋下了愛摎佢除忒介殺機，楊脩還鼻弄弄為佢去賣命，正經係一隻「七月半介鴨仔──毋知死」啊！
楊脩為人才高膽大，無所顧忌，常常觸著曹操。一擺，花園起好，曹操去看，就在門上寫一隻活字。無人知意思。楊脩斯講：「門內加活，就係闊字。丞相嫌門昶闊。」斯摎門改較細兜仔，曹操當暢，等佢知係楊脩能了解佢介心事以後，表面歡喜，心肝頭斯當畏佢。又有一擺，人客送酥糖來。曹操在頂高寫「一合酥」三隻字，楊脩看著，就當得意，呵天樂地介發分大家食，曹操問佢麼介意思，楊脩講：「你毋係寫等『一人一口酥』乜？」曹操雖然笑笑仔，心肝肚就暗下決心，愛收忒佢。
當曹操戰事無順，進退為難，心肝鬱卒，有氣無廳消，尋無人出水介時節，有人送來一碗雞湯，裡背有雞肋。恁堵好，大將夏侯惇落來問暗晡夜介口令，曹操隨口講：雞肋。楊脩聽著以後，就吩咐下去，可以整理行裝，準備退兵咧，夏侯惇感覺奇怪，楊脩斯講：「從雞肋來看，食之無味，掉忒打爽。這下，曹操前進毋會贏，退又驚見笑，毋當早兜仔轉去，斯有退兵一條路。」夏侯惇講：「你正經係大王介心肝啊！」該暗晡，曹操反躁睡毋忒，就去巡營，看著全營官兵全部在該打包袱，著驚一下。等佢了解情形以後，當閼，呵咄講：「你仰恁大膽，造謠講虛玄，打亂亻厓軍心。」就摎楊脩𢱤出斬首。後人有詩講：「身死因才誤，非關欲退兵。」可見佢死著冤枉。
也有自恃才高，像一隻鳥仔，無意無思飛等去送死，該就係年少輕狂，擊鼓罵曹介禰衡。因為孔融欣賞禰衡才華，推薦分曹操，曹操係亂世奸雄，禰衡本就鄙視曹操，愛替天下人出頭，斯大罵曹操，後來又罵劉表，口出狂言，侮辱黃祖，結果罵佢兜，像蚊叼角共樣，無㾂無痛，嗄分黃祖㓾忒，「舌嫲做劍──顛倒死」，做無謂介犧牲，雖然講：「人不輕狂枉少年。」不過，「三寸舌嫲，害死六尺大爺。」恁樣死忒，實在係無價值啊！你看，楊脩34歲死，禰衡26歲亡，當係青春年華介時節，正經係「銃打出頭鳥，一下就無命；水涿出頭椽，早早斯歿忒。」
可見，銃打出頭鳥，水淋出頭椽，係人生智慧，行事準則介啟發。凡事毋好過當，對人愛謙虛，做事愛謹慎，毋好昶逞，毋好沙鼻，因為，樹大惹風波，才高惹目赤，做老子講介：「欲上民，必以言下之。」軟語入心，不敢為天下先，在最適當介時間出頭，最適當介空間做跳手，天時地利人和，像該「諸葛一生唯謹慎，呂端大事不糊塗。」有這標竿，希望毋好有銃打水淋介危機啊！
※本文的「介」為大眾通用的「的」，同教育部訂的「个」之意。
