客家咖啡香──2023「關西咖啡節」
【圖、文／鍾孝昇／桃園市中壢區龍岡國小教師】
發音人：邱新春（四縣腔）
講著臺灣本土个咖啡，大部分人定著會想著个，毋係雲林古坑，就係臺南東山个咖啡。無毋著，因為咖啡係熱帶摎亞熱帶个作物，故所臺灣對1884年英國人引進咖啡苗了後，咖啡个栽種就在中、南部偎山區个矮山仔為主。
毋過有一群北部山林肚个農民，佢兜克服地形摎天時个限制，用客家人煞猛打拚个精神，透過科學个方式，摎專業个管理，生產出「精品」等級个咖啡。3月19日在新竹縣關西鎮舉辦个第二屆「關西咖啡節」，就係佢兜摎這充滿在地客家風味个咖啡，推廣分消費者品嘗个舞台。
這擺个關西咖啡節活動，係由馬武督咖啡生產合作社主辦，有12个咖啡莊園主，提供18支咖啡豆，分遊客帶等環保杯，品嚐這兜本地咖啡。會場當中，還有專業導覽員，帶等遊客認識咖啡園个環境、咖啡樹个栽種，分遊客體會從一頭咖啡樹到一杯咖啡，這過程當中，農民係仰般用心來照顧。
另外，活動現場還有準備焙豆仔用个缶泥鑊仔，分遊客體驗，品嘗自家用缶泥鑊仔焙个咖啡，體會手作个趣味。主辦單位還邀請到新竹縣新住民家庭服務中心，在百年歷史个錦山橋項，擺出各國特色个咖啡攤仔，分泰國、馬來西亞、印度這兜國家个咖啡香，在鳳山溪項飄香。
除忒今晡日个活動，主辦單位還在3月13日舉辦評鑑比賽。比起舊年第一屆正有7个農友、8支咖啡豆參加，今年有12个農友，做出19支咖啡豆來參加比賽，還過邀請四个有專業證照个師傅來評鑑。今年个成績，總下都在80分以上，都有達到「精品咖啡」个等級，看著出在合作社个支持下，農民種咖啡摎焙咖啡个技術，都有當大个進步。
馬武督咖啡生產合作社理事主席宋明光先生表示，關西6年前開始試種咖啡，到這下種个面積既今有12公頃。34个農民乜在三年前，成立生產合作社，建立自有咖啡品牌：「馬武督咖啡」。
宋明光表示，合作社成立後，邀請著農改場个專家，𢯭手農民做泥肉分析、病蟲害管理、咖啡豆生產履歷建立、咖啡樹修枝、接枝這兜技術，分農民在種咖啡个過程當中，有較專業个科技幫助。另外，乜邀請到陳璽文先生个「井井咖啡團隊」，𢯭手「杯測」咖啡豆，協助農民通過焙咖啡豆个中級考試，提高咖啡个品質。
第二屆「關西咖啡節」評鑑比賽，頭名係由馬武督咖啡生產合作社理事主席宋明光先生得奬。
本旦在科技業服務个宋明光，因爭對家鄉有當深个感情，轉到家鄉後，就在个思考，係毋係有麼个產業，做得分這位發展起來，分後生人留在家鄉？下後，佢知著關西這位，頭擺有種咖啡个歷史，故所佢就鼓勵大家種咖啡，還過成立合作社，推廣家鄉種个咖啡，希望分較多个人知得，關西除忒仙草、油桐花，還有咖啡做得摎大家分享。
這擺擔任咖啡導覽員个羅裕華先生表示，愛在天時較冷个北部種咖啡，確實有當多个困難，特別係冬下時个寒害摎強風，長透使產量摎品質受到傷害。不過，佢還係用客家人開山打林个精神，還有農業單位个專業協助，加上友善農業个方法，摎自然環境共下成長，顛倒成就了這充滿客家味緒个咖啡。
啉著這杯家鄉出產个咖啡，亻厓有當多个感想。雖然亻厓兜關西鎮个地形、天時條件，並毋適合來種咖啡，毋過在農民个煞猛打拚下，克服千難萬難，種出這兜充滿客家味緒个馬武督咖啡，這杯又醹又香个咖啡，實在值得大家親身來體驗。
第二屆「關西咖啡節」活動，餳著當多人來參加。立法委員林為洲、關西鎮長、縣議員這兜民意代表，還有在地錦山國小个學生仔乜共下來鬥鬧熱。
