男女之防
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
飲食男女係本性 越禁越防越深情
係講堵著心肝命 日日癡心來認定
又講初中畢業該年，時好命靚，連連放榜，連連有名。阿爸又暢又心焦，暢係台中一中好名聲，愁係無錢註冊手扡扡。
上家下屋盡假情，見面就說，恁會讀書，下二擺做胗做肝。翻面又講，若爸毋係開糖店，若姆毋係繡花娘，不偷不搶，哪來錢銀繳學費？想來想去想無路，臨尾還係賣豆腐。跈等阿哥个腳步，行入師範教書个路途。
讀師範，註冊毋使錢，三年畢業，頭路便便，出來做先生。撐毋飽，餓毋死，輕鬆過日一生人。
新竹入學係新生，帶等被骨鐮仔去註冊，割草扛泥扐石，訓練新生刻苦耐勞。天吂光，人吂醒，三長兩短，老楊噴號，舂舂撞撞遽遽䟘床。著衫著鞋，洗面牙搓，屎尿難屙，緊急集合，最驚人多，教官喝咄，不分人我。
這下正知，「早點」係打早點名，毋係食朝，「晚點」係暗時點名，毋係宵夜。每日朝晨暗夜，唱軍歌，走操場，聽訓話，做體操，這就係師範第一課。
生活教育，做中學。學校規定：
學生全部歇學校，除忒拜六下晝，開完班會發外宿證轉去，揕好家長印仔，禮拜日晚自習之前轉來，其他星期一到星期六在校期間，無請假核准，就私自出校門，記一大過。
竹師學生仔，規定細倈仔留三分頭，細妹仔頭那毛剪到齊耳公，爭差一息，記警告一擺。
行路手掄到褲袋，教官看著，記警告一擺。
外套攣紐仔，第二粒以下無扭，記警告一擺。
逐日檢查內務，被骨無摺到像豆腐乾四角四角，記缺點一擺。
牙确仔、茶箍盒仔、牙膏、牙搓仔無放正，記缺點一擺。
男女對話，無經過訓導處登記同意，私下面談，記小過一擺，
所有人寫分細妹仔同學个信仔，全部導師先看過，查著情書，壓等到愛畢業嘎下，做一下交分收信人，這係細妹同學盡寶貴个畢業禮物。
最嚴重个，男女談戀愛分學校捉著，記三大過。
攏攏總總，加加起來，記有三大過，就退學。
這兜規定就係崖兜十五歲到十八歲个精彩人生。
這種生活，這種規定，這種男女之防，
係還講毋係出差世，仰仔正係出差世？
係還講毋係前世無修，仰仔正係前世無修？
還記得當時：
學校伙食由學生組成伙食委員會，總務出納細妹仔，採買用錢細倈仔，男女接洽討論，定著在訓導處公開進行。識有男委員錢無算著，走去教室尋出納算過，結果犯著私下討論个禁條，記小過一擺，實在冤枉。
另外有親姊親老弟，阿姊三年生老弟二年生，五月節老弟轉鄉阿姊無轉，阿姆搭老弟拿粽仔分阿姊，老弟無經過訓導處同意！直接拿粽仔去厥姊个教室，分學校發現，乜差一息仔就記過處罰。
就係管忒嚴，有一个學長同厥隔壁鄰舍也係學姊，兩儕交男女朋友，快愛畢業欸在圖書館約會，分學校查著，本來愛退學，背尾唸在就愛畢業欸，記兩大過留校察看。等到畢業典禮第二日，兩儕挑挑打早就倒轉學校，手牽手在校門大大方行等入來，抗議佢兜對學校制度个不滿。
這兜事情，現下講起來拿人个講古樣仔，無幾多儕會相信。毋過崖十過年後寫論文，調查大陸過來个老兵，講佢兜个家鄉，婚外情个男女，分人發現，兩儕捆緪緪，扛去遊街石頭擲，最背尾自殺解決。
今晡日，人權保障，婚姻自由，所謂个通姦罪也解除欸，亻恩兜平凡个飲食男女，也堵好行過前世無修个時代，變前世有修哩。
毋過，在這位，崖係講崖讀師範該下个男女之防，本本係前世無修。有詩為證：
問崖愛情有幾重？千金萬噸算無通；
可惱社會恁多喙，料想自在白頭翁。
※本文的「崖」同教育部訂的「亻厓」之意。
