愐
【文／邱一帆／國立中央大學客家研究博士班】
發音人：邱一帆（四縣腔）
歲月載等記憶
一步一腳緊行緊遠
漸漸仔消失
在目珠看毋着
在耳公聽毋着个地方
記憶裡肚个悲傷
敢有影跈等老人家過背
在這細細个海島項
還有麼人會愐起
該春寒慘白个年代
有幾多儕人衰過
死在無耳公个銃聲
有幾多儕人冤枉
關在無目珠个囹仔
又有幾多儕人目汁雙流
在無人知个暗夜
在無人知个所在
有目汁噭到無目汁
二二八這苦難个符號
既經轉譯
變成樂暢个連續假期
過去个就分佢過去
管佢轉型毋轉型
正義毋正義
心靈平安个追尋
毋使講起頭擺頭擺
2023.03.04
