客家伯公
【文／鍾榮富／南臺科技大學應用英語系講座教授】
發音人：鍾榮富（南四縣腔）
客人个來源、歷史，到今都還毋係係清楚，各種學說、看法、主張都有，莫衷一是。但係各種主張裡背，乜有一個共識，那就係講客人屬於多搬遷，多徙位个族群。若係這個看法做得接受，大家做得設想，吾等个祖先每擺去到新地方，都愛佔用別族群个耕地、水源、食物，正做得生活，正做得延續客家香火。講過好聽啊，客人流浪到新个所在，想愛落腳歇下來，至少愛先做兩件事。第一，心理愛先穩定下來，故所愛立伯公來拜。第二，屋舍愛先做好來，客人个夥房，基本上就係一個「防衛」單位。
來到新位所，在流離艱難之中，踏着土地，心中有兩種心情交融混雜，一來感覺著驚怕，驚外族來侵犯。二來感激天地，無想着在這地方尋着做得立足之處。因為著驚，愛有具體个祭拜神明，愐起頭擺父母都拜伯公，故所在住家附近，先立一座伯公分村民拜，不管用石頭、樹頭，這就係伯公个來源。任何客家莊，外型、內肚多少都有相像个特色，外有伯公，內有彎彎曲曲个路。客人過多个村莊，定著有開基伯公，有莊頭伯公，前者感謝伯公分亻厓等機會，讓遷徙中个百姓能夠開墾屬於自家个莊園。莊頭伯公大部分係宣示性質，大約同附近个種族標明領土个分界線。心理肚，客人也因為有了伯公在莊頭守衛，過毋會感覺驚怕。實在講來，伯公在精神上就係表示客人去到新所在、面對新族群、心中各種个驚怕心理。
學佬人寫个文章，大部分都講客人个伯公，就係佢等个土地公，輕輕一筆，就帶過去了，毋願多講客家伯公个特色。這種講法，到今乜分蓋多客語先生接受。個人認為這係完全毋著个觀念。客人个伯公，不單淨係敬畏土地个表徵定定，盡大部分還係客人從細到老个心理同精神根據。客家子弟不管一發達，一成功，心中都有一個「伯公下」。「伯公下」个「下」同「屋下、灶下、廳下」个「下」共樣，係指一個地方、一跡位所，但係到底有幾大，幾闊，永遠都無明確个劃分。故所亻厓講客家伯公毋係土地公定定。
其實，伯公个外貌，反映了百姓个生活現場。開荒拓墾時期，石頭最常看著，該時期个伯公通常就一粒石頭定定。後來大家生活進步，經濟發展過好，村民改用石碑來做伯公。時代緊進步生活緊富足，接等就在石碑頂上起廟，漸漸有伯公廟个樣子。有了廟，就同百姓有屋仔共樣，最先想著个就係鐵窗仔。百姓簡單个想法，自家屋外有裝鐵窗仔，當然愛同伯公廟做鐵窗仔。於今，石頭伯公已經毋多見了，大部分都改用鐵窗仔圍等个伯公廟。
學佬人後來做土地公个人公仔，客人有兜伯公廟肚个伯公，乜有人用這種人公仔，但係不管仰仔，客家个伯公廟，內肚淨淨拜伯公，毋會有其他神明。學佬人个土地公廟，除忒土地公，定著還有擺等其他神明(像瞭哪吒、王爺、開漳王等等)。
