生命个韌性
【圖／文／温育華／草漯國小教師】
發音人：温育華（海陸腔）
阿姆看亻厓逐日囥到屋下，無出去行行走走，身體像飼料雞樣恁毋砸磳，一講破病就破病。隔壁个阿碌伯認為鍛鍊身體最好个方式就係蹶山，這下一有閒亻厓就會去蹶山，增強自家身體个扺抗力。
有一日下晝三點半過後，亻厓照常去蹶山，有一隻毋知死个蜂仔，緊在亻厓頭該脣「嗡！嗡！嗡！」喊無停，還得人惱哦！還在亻厓面頭前捩來捩去，像烏蠅看着蜂糖樣，這根本就係摎亻厓下挑戰書，一開頭亻厓無插佢，毋過佢在亻厓後背跈等毋放過亻厓，這擺亻厓正式發譴，一轉身拿起背在背囊个袋仔，向等蜂仔飛个方向擲過去，恁堵好蜂仔分亻厓擲著跌落地泥下，像暈死忒樣。行過去跍下來觀察，佢个翼動一下，過無幾久（大約三分鐘），這隻小東西轉醒慢慢仔飛起來，又對亻厓做出攻擊个動作，小傢伙像愛尋人報冤仇，總係對亻厓个面頰卵攻擊，亻厓開始毋客氣就做出回擊个動作，摎蜂仔打落地泥下，還用腳出力跺幾下正甘願，摎蜂仔跺入泥竇肚時愐想，這蜂仔死著真淒慘，分人跺入泥肚就算無死乜伸半條命，永久翻身無得。
等到亻厓愛走該下，看著泥竇肚有東西蠕蠕動，看清楚兜嗄著下驚，敢講這傢伙無死？還想愛鑽出來？！故所亻厓耐心等等佢，過無幾久蜂仔正式鑽出來，有一片个翼胛斷忒，看佢著傷亻厓就無再過跺下去，無想著蜂仔个生命力恁頑強。
這下換亻厓愁慮佢飛毋起來，佢還在該修復自家个翼胛，用幾雙細腳拚命修，等修好時就慢慢飛起來，一開始飛毋好勢踜踜蹭蹭、撞上撞下，毋過還係當硬頸拚命緊䟘起來緊飛，最尾克服萬難飛起來。
這擺蹶山，經過這件事情，亻厓漸漸仔了解一個道理，該就係：「自家跌倒自家爬，愛人扶持都係假。」不管發生麼个事情，總愛有堅強毋驚失敗个精神。
