縮影公園坐飛機到泗水
【圖／文／江卓安／中央大學客家語文碩士班】
這係到椰城，也就係雅加達个第二日，這位愛同大家講一隻當得人驚个事情，就係講啊，印尼个乞食仔，卓安自家都喊該安到金童，係，無毋著，就係金童玉女个金童，做麼个會同這金童玉女有關聯呢？
因為啊印尼个乞食仔，大部分都係細人仔出來做，根據網路新聞个文章講，這項「頭路」个月給，係講景氣好个時節，做得有臺幣四萬銀左右个高度。拉轉來金童个名稱，這兜乞食仔个外型分兩種，一種个係打扮做萬聖節个樣仔，希望你做得分佢錢，另外一種个就係會摎自家个皮膚塗一種金銀色个油漆，過會拿一隻桶仔愛你分佢錢，毋過這兜乞食仔乜已精，專門擇華人來討錢，Cindy阿姊，也就係當地个導遊講，該毋使管佢兜，該有兜係毋好讀書个歿子弟，你係講看着實在已可憐个，你正分佢兩千印尼盾就好。
這係印尼椰城裡背肚自家感覺最得人驚个部分，因為你無分佢錢，佢會緊企在該緊看你，自家又會有壓力，最分卓安嚇著个係，拉等伴共下去椰城个便利店，正結帳忒愛離開店舖，該金童就企在門脣等好來，差一點啊屎尿無洩出來。
這係較得人驚个地方，毋過還係有好尞个地方，這日大家人來去了一隻安到「縮影公園」个地方，裡背肚摎印尼萬零隻島嶼个特色都展現出來，裡背有一隻最有客家味个就係：印尼客家博物館，這展現了盡多印尼客家个由來同印尼客家个大人物，厥个外型同臺灣个客家場館共樣，都係用圓樓个形投來起个，裡背還有賣紀念品个地方，買了當多等路做得轉來分好朋友同先生。
朝晨頭去了縮影公園以後發現下晝去泗水个班機竟然提早，單淨聽過延後宕時間个班機，無聽過會提前个，就因為恁樣，大家就遽遽到椰城機場去坐飛行機，結果掛好行李个下一秒又講又變轉去原本个時間，實在搣衰人哦～毋過乜因為恁樣，做得在機場大廳遶尞一下，同大家推薦一個品項，安到「班蘭拿鐵」，這係班蘭葉个醬加入牛奶个涼水，盡有南洋風味，又因為厥顏色係綠色个，加上牛奶个白色，該杯仔个色目就係粉青色个，異有大草坪个感覺，食忒該杯涼水後，大自家就坐飛行機到印尼泗水了，係講去泗水个飛行機个艙肚廣播，自家單淨聽得識「jakarta」「surabaya」「terima kasih」這三隻印尼單字，希望自家在泗水這幾日做得學過加多單字，毋單淨係用比手畫腳過「客氏英文」。
