2022 印尼泗水探訪之旅
【文／徐彩勻／客家語文暨社會科學學系】
二月初个時節，非常幸運做得跈等院長、芬芳先生、還有學長、學姊共下出國去到印尼泗水(Surabaya)，這十四日毋單淨學着盡多知識，對客家乜有更加多个了解摎想像。
前兩日先去拜訪印尼客屬聯誼總會還過參觀吔印尼客家博物館。客屬總會个阿叔阿姨都當熱情，當多水果、麵包恬恬仔落到肚屎裡背；佢兜講客話毋單淨特別親切，聽着恁滑溜个客話乜分人試着當難得。壁項掛等盡多个書法字畫、牌匾，內容大部分係講客家人愛團結共條心，客人都係一家人，這種「人情」深刻个刻在亻厓个心肚。
（印尼客屬聯誼總會書法牌匾 1，作者提供，攝於：2023.1.30）
（印尼客屬聯誼總會書法牌匾 2，作者提供，攝於：2023.1.30）
該央時蘇哈托(suharto)政府禁止華語、摎華語學校全部關忒，聽講華人在路項輒常分人打。對印尼个華人來講，這係一段當艱苦个歷史；這白白个四十零年，客家話無好傳，異多客人乜轉去中華个故鄉，對印尼个華人來講，恁樣同客話還過客人尋轉來，族群之間个情感定著係需要好好培養。乜係因為這無法度忘忒个痛苦，佢兜正會更加煞猛傳承客家文化，團結客家人，俗話講：「三人同一心，黃泥變成金」，相信印尼个客家事務都做得越來越好，發展順利。
（印尼客屬聯誼總會幹部與本院院長合影，作者提供，攝於：2023.1.30）
再過就係去參觀泗水个廟，廟肚个神明盡多，比論講天公、媽祖娘娘、恩主公、伯公、玄天上帝、廣澤尊王這兜。因為有各式个神明愛拜，故所逐儕，敬神个時節都愛拿大大把个香正罅擺；每一个神明都有號碼，恁樣信徒做得較清楚行香个順序，實在盡生趣。
（泗水北極宮玄天上帝林炘誼學姊提供，攝於：2023.2.11）
係講做麼个會有恁特別个現象呢？因為印尼華人个宗教信仰係「三教合 一」：佛教、道教摎孔教。原因大體係受着印尼蘇哈托(suharto)政府排華政策个影響，還過就係華人去到印尼个歷史脈絡。
（泗水福安宮觀音佛母神像，張曉菁學姊提供，攝於：2023.2.2）
（泗水福安宮花公、花母、吉祥哥哥神像，作者提供，攝於：2023.2.7）
（泗水福安宮王教聖人神像：太上老君、孔子，作者提供，攝於：2023.2.7）
因為蘇哈托(suharto)政府个排華政策，印尼个華語、社團組織、信仰、食物分政府有計劃个消失吔大約四十零年，使得現下較後生个華人既經毋會講華語，華語當危險，何況係客語！會館个成員大部分係年紀較大个阿伯阿姨，青年部愛恁般餳後生人，這係當值得思考个問題。該時節政府毋承認孔教係印尼合法个宗教，造成華人傳統信仰个流失同轉變。因為在地化个影響，印尼中華菜个味緒乜摎本旦个中華地區無共樣吔，更加融入印尼鄉土个料理方式同口味
（惠潮嘉會館內部，作者提供，攝於：2023.2.1）
（文廟人員與客院師生合影，林亦謙學長提供，攝於：2023.2.5）
（古氏宗親會成員之手芋頭餅食，張曉菁學姊提供，攝於：2023.2.1）
面對這兜挑戰，印尼个華人定著還有盡長个路愛行，過程可能異艱苦，毋過就像老古人言講仔：「人在該做，天在該看」，只要煞猛打拚一步一步定定仔行、確確實實个堅持落去，印尼个華人定著做得享受到美滿幸福个生活。
（客院師生、印尼師生及會館、宗親會華人成員於九龍宮酒家合影，林亦謙提供，攝於：2023.2.1）
