北部橫貫公路歷險記
【文／彭欽清／國立政治大學退休教授】
發音人：彭欽清（四縣腔）
民國五十七到五十八年，亻厓在大湖國中教一年。共下教个有一個金丹谷先生，教理化，成功大學畢業，江蘇人，歇台北，生來斯文到有好伸，人又高溜高溜仔，戴一付烏框个目鏡，幾下個細妹先生過職員已昏佢，毋過就係無厥緣。同事喊佢老金，喊亻厓老彭。
亻厓兩儕教一年就辭職，老金去臺北一家公司上班，亻厓轉政大做助教。佢上來無幾久仔就考着odoby執照，買一輛二手个odoby機車。九月仔，佢講愛載亻厓共下去行北部橫貫公路到宜蘭。這條路正開通三年，該下仔拜六還愛上半日班，亻厓兩儕就約講十月初仔尋一個拜六下晝去。
該日食飽晝， 佢就來金華街政大公企中心載亻厓，先騎到三峽過復興，在三民街項同odoby个油加到淰，尞一下仔，食兜仔點心，順續仔尋一間odoby行同車仔巡一遍，輪仔洩飽風，正開始騎往角板山。
歸路仔毋係黃泥路就係細石仔路，路當狹又彎斡，當多tolaku過鐵牛車，駛到愛遽又愛遽，對面來个車仔愛防，背後來个乜愛防。騎了成半點鐘仔，後輪嗄凹忒，煞煞停下來看啊仔，死該了，輪仔分一支鐵釘仔刺著。
兩儕遽遽同odoby一儕牽一儕𢱤搣轉三民街項个odoby行補輪仔，等輪仔補好就會臨暗仔了，頭家講騎得到宜蘭會半夜了，這條路日時頭就無麼好騎，莫講暗晡頭，喊亻厓兩個還係轉臺北較安全。
老金講來就來到這吔，無行宜蘭一轉毋甘願，問亻厓仰仔，亻厓應講好啊，正經係戇人有戇膽，就恁仔再過騎入山。愛趕路，老金緊騎緊遽，全無心性看景色。等到斷烏了，除忒odoby頭燈个光以外，四圍總下暗暗，大山肚項麼个就看毋着，兩儕正知驚。
一直騎上崎，騎忒好久吔，odoby嗄緊無電，愛緊踏打分佢發，最尾打毋會發，無奈何，老金抓handolu在面前牽，亻厓在背後𢯭𢱤，兩儕𢱤到歸身仔大汗正將odoby𢱤上桃園宜蘭合界个大峎頂。老金講佢有查過資料，這位个標高有千一、二公尺。風吹啊來好冷仔，亻厓兩個毋知頭天，當晝還著等短袖个衫就出門，這下正知差。
濛沙煙已大，好得有月光。兩儕當下決定溜大崎下去，佢近視負責騎，亻厓坐背尾指揮，靠等濛濛个月光，看等普白普白个路，喊佢行左抑行右，有一截仔路當彎斡，兩儕就緊張到會死。兩儕學精了，安全第一，定定仔溜，無把扼該下就停下來。
溜了點零鐘吔，下到較平个所在，濛沙煙無了，看着面前有一間屋，有電火，看啊係退除役官兵輔導會森林開發處在棲蘭山个工作站。就去搉門，幾下儕來應門，看着亻厓兩個恁背揹，喊亻厓兩個先去洗身腳，拿賁个衫分亻厓兩個著，有个去煮麵分亻厓兩個食。
亻厓兩儕緊食麵緊講承蒙，同一路个經過講分佢這兜聽。聽忒，佢這兜相賽講，你兩個毋知死个，命係拈轉來个，往年這站仔會已多雨，路滑溜溜仔，今年雨水較少，路較燥，係無你兩個定著會跌到九彎十八拐該截路个大崩崗下了，身屍骨頭末就尋毋著。老金同亻厓頭犁犁仔緊食麵緊會失禮，食飽遽遽睡。
天光睡䟘起來食飽朝，幾下個會整odoby个榮民弟兄就同老金个車仔巡一遍，換過badeli，輪仔个風洩較飽兜仔。亻厓兩個對這兜恁厚意个榮民弟兄千承蒙萬承蒙過後，就繼續騎對宜蘭去。
好死毋死，騎到會到牛鬥該下，後輪又無風吔，好得離牛鬥火車頭毋會已遠，亻厓兩儕又再過又牽又𢱤同odoby𢱤到車頭，這條火車路係大平山運樹材到羅東个鐵路，車枋毋多。坐上車就過晝缽𤊶了，兩儕決定去礁溪歇，同odoby寄火車轉台北。
轉到台北，頭件事情就係煞煞去買當時盡好个三五牌洋煙五條，還過其他食个東西寄分這兜大恩人。
老金同亻厓該擺在北部橫貫公路，險險無命好食番薯湯。兩儕就講學着一個教訓：雖然講騎馬行船三分命，毋過愛去遠位遶尞，還係愛做好十足个準備，係無會仰仔就毋知得。
