𠊎盡好食个一品菜
【圖、文／吳秀貞／苗栗縣銅鑼國小教師】
發音人：吳秀貞（四縣腔）
爌肉就係𠊎盡好食个一品菜。
臨暗仔放學轉來，係鼻著爌肉味，就係吾婆煲爌肉了！該日暗晡又會食加兩碗飯，又有口福哩！
吾婆會用堵堵好腈、堵堵好肥个三層肉，倒兜仔豆油、米酒，放落蒜頭、辣椒仔，擲兩粒仔冰糖，先炒一下仔，正用細火慢慢仔煲，煲到酪酪，該煲出來个爌肉，當餳人食，逐垤油金油金，鼻起來當香，豬肉一落嘴就化開，白飯傍爌肉，食起來就恁合味。問阿婆仰般煮个？仰會恁好食？佢就笑弛弛仔講：「這還毋算麼个，該大鑊煲出來个爌肉正好食！頭擺，哪家人做好事，大家就會集共下𢯭手辦桌，張伯姆好手腳，幾下十張桌，一煮爌肉就一大鑊頭，該煲出來个大大鑊爌肉，係盡香、盡有味緒个，食到你連舌嫲就會吞落去唷！」
有一日，適廟坪項過，看著一个阿公坐到屋脣个凳仔項，手項拿等一碗水粄仔，一口又一口拐厥孫仔食。𠊎就想著細細仔个時節，鄉下人家，無像現下有便利商店24點鐘開店，愛買麼个食，隨時就買得著，因為屋下無麼个零嗒好食，故所細人仔係嘺人、起雷追該下，阿婆就知𠊎肚飢哩！添著一碗飯，攞兜仔爌肉味，摎爌肉擘幼幼仔攪到飯項，兩子阿婆坐到矮凳仔項，阿婆正用細調羹仔一口一口飼𠊎食爌肉飯，「啊…嘴擘較大兜仔，再來一口！還乖哦…」𠊎看等阿婆慈愛个目珠，不知不覺該碗香馞馞仔个爌肉飯，一下仔就食忒吔！ 阿婆惜𠊎个溫暖回憶，又再過浮在吾腦海。
有一擺，跈屋下人去台北飯店分人請，當豐沛，𠊎夾一垤爌肉來食，咦！這豬肉仰會有一種羴味，記得阿婆緊搖頭緊講：「這係飼料豬，𠊎食毋慣這種味道，還係𫣆本地个爌肉正好食！」，𠊎戇戇个問阿婆：「做麼个飼料豬煲出个爌肉會毋好食呢？」，阿婆講：「烏豬仔啊！係講食豬菜摎番薯還有米粥水煮出來个汁，該豬肉食起來就無共樣哦！煮豬肉湯特別清甜，豬肉無飼料个羴，煲出來个爌肉正好食！」，原來這品菜，除了愛料理个好手藝外，豬肉料个品質一等重要。
回憶中，見擺係寒著發燒，連食兩禮拜个西藥，食到糟腸扡肚該下，就會當想食一兩垤仔煲个又香又酪个爌肉，𠊎心肝肚愐等燒燒个爌肉飯，毋知有一好食哩！想到吾口涎水就吞無停，遽遽笑嘻嘻仔使妮喊阿婆煲爌肉分𠊎食！阿婆逐擺就講𠊎：「恁精食！」
這下𠊎也做人爺哀仔，爌肉這品菜，有阿婆惜𠊎个淰淰回憶，感覺食爌肉係一件盡幸福个事，𠊎也煲仔出好食个一鑊爌肉，逐擺看著屋下人聚共下食飯，有講有笑个分享一日做事、讀書个大細項事情，爌肉這品桌心，串起一家人个情，就像還細時節个阿婆同𠊎个深情，醹到化毋開，希望大家也同𠊎共樣享受得著食爌肉个快樂同幸福！
