羅馬公路項个帝王柑
【圖、文／鍾孝昇／桃園市中壢區龍岡國小教師】
發音人：邱新春（四縣腔）
帝王柑皮薄多汁，當像柳丁，一㼓一㼓个肉，又像柑仔，有「柑仔王」个名聲。
時間過到異遽，又到了舊年尾、新年頭个時節，連接桃園、新竹个羅馬公路項，除忒楓、槭陸陸續續變紅，盡餳人个，就係打到當結个柑仔，這兜淰黃淰黃、飽滿个果仔，摎這條山路打扮到「橙黃橘綠」个樣仔，這下正經係一年當中，大家來這遊尞个好時節。
對台三線六十公里个位轉左手析，車仔駛入人講「羅馬公路」个縣道118線，黏時就看得到大路脣，有當多賣柑仔个看板，同過路人擛手，還有一籃一籃个柑仔乜放在攤仔項，等人客來交官。詩情畫意个路名，加上分人流口涎水个果仔，餳著當多人停下來買。
講起柑仔，有各式各樣个品種，大體做得分做柳丁、賁皮柑（華語安著寬皮橘）、檸檬摎萊姆、柚仔這幾類。一般所講个柑仔，像係椪柑、桶柑、茂谷柑、砂糖柑……等就係屬於賁皮柑這類个。係講做麼个愛喊做「賁皮柑」，係因為這兜果仔个皮拗蠻仔朗膨，肉摎皮當容易分開來，故所安名「賁皮柑」。
在臺灣，堆山塞海个柑仔種類中，椪柑、桶柑種植个面積盡闊，產量乜盡高，在羅馬公路，抑係台三線兩片路脣，大體乜係種這兩種，故所當便宜值食，乜係市場中盡容易買着个柑仔。另外，外皮滑溜，圓球形仔，食起來較甜較燥个海梨柑，係新竹地區个特產，在羅馬公路兩片个攤仔項，乜做得看著厥形影。
這幾年新出个砂糖柑，因為外型細細仔，當得人惜，糖度還做得達到12到13度，係攤仔項銷頭異好个商品。乜因為問个人盡多，有兜攤仔就直接在看板項，寫著「砂糖柑」三隻字來招生意，可見佢當受人歡迎。
在恁多个柑仔改良品種當中，摎砂糖柑共樣大賣个，就係帝王柑。
比起一般个柑仔，帝王柑較細一息仔，皮大體係淰黃色，皮還係青色該下，無注意看還會話著係柳丁，毋過一㼓一㼓个肉，就像柑仔共樣，用手就做得擘開來。因爭特別个風味摎皮薄多汁个優點，故所得到了「柑仔王」个名聲！
大賣个商品，背尾總有一隻故事。聽講在清朝个時節，有一位皇帝，到江南遊覽該央時，食著了帝王柑，佢試著當好食，就下令逐年都要摎帝王柑進貢到宮廷，故所就摎佢安名，喊著「帝王柑」。
根據賣帝王柑个店頭家講，因為厥皮當薄，水份又多，落水季節當會裂果，又因為樹椏有盡多竻，這兜竻仔會生到三公分恁長，照顧摎採收都無利便，故所價數比起一般柑仔過較貴，一台斤起碼愛四、五十箍，今年因為收成毋好，故所又過起價，看來想愛食著這皇帝愛食个果仔，錢銀愛款較多兜仔正做得。
「一年好景君須記，最是橙黃橘綠時。」在這冬春交接个季節，𠊎緊尋味著羅馬公路上个帝王柑，嘴項緊吟著蘇東坡這幾句詩詞。𠊎想，已到不惑之年个𠊎，雖然青春年華不再，毋過今這下算起來乜係人生个黃金階段，就像柑仔成熟了愛收成共樣，該當愛利用這大好時光，較煞猛打拚正做得。
做毋成京城个皇帝，用心打拚過生活，還係做得做自家羅馬城肚个帝王啊！
「砂糖柑」因為外型細細仔，又當甜，係攤仔項銷頭異闊个商品。
冬春交接个季節，羅馬公路大路脣項，當多攤仔在个賣各式各樣个柑仔。
桃、竹、苗个台三線大路脣項，乜當多攤仔在个賣各式各樣个柑仔。
