中壢仁海宮个人文藝術風華（下）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
吳秀才主持修建仁海宮，非常重視石匠个手藝同專業能力，定著會喊佢兜落款。這恁樣个要求，對打石師傅來講，係無哪比个光榮，故所這兜師傅就更加煞猛，完成佢兜个作品，留下佢兜个名姓。還有，普通一間个廟，石雕師傅就一組人定定，無就兩組「對場做」。仁海宮請張火廣、張秋成（圖3）、蔣玉昆（圖4）、李晚生這四個師傅、帶等四組人馬「相拚仔」，這係當特殊个良性競爭，因為吳榮隸个用心規劃，仁海宮變到一間非常有特色个建築。
圖4 蔣玉昆个石雕之一（2023.01.16攝）
臺灣光復過後，仁海宮由陳貴邦擔任主要管理人。到民國50年正月，發起修整並做主任委員。佢請名建築師王景賢來做建築師。王建築師係學西洋建築个，採用鋼筋紅毛泥結構，洗石仔柱楯，另外還請交趾陶大師洪坤福个師仔陳天乞、陳專友兩儕，完成廟項剪黏同交趾陶个藝術裝置。當時建築界有一句話講「保有乞司作品就係古蹟」，可見厥个藝術文化價值有幾高仔！還有這擺請着馬亦飛、呂傳命、陳瑞安、許永南、施孟宏這兜名書法家，同佢兜所寫个對聯化為實心銅字，鑲嵌到洗石仔柱楯項，在全臺灣還吂識聽過，馬亦飛講係「民國第一」。這擺个修建，增設鐘鼓樓，到民國56年完成打醮。該下个仁海宮，前殿係拜殿，中殿供奉媽祖，後殿二樓主祀觀音菩薩，樓下蓮花噴水池、18尊羅漢、山水水沖池，一樓後背設有涼亭花園，分香客好休尞。
民國81年，董監事會決議開兩片側門變到「五福臨門」，迎接各方信士來到仁海宮。過忒兩年又將後花園改為第三殿，選宋盛興做名譽主任委員，梁雙雲做主任委員，劉坡榮做總幹事，開始起建，經過兩年零，到86年6月26日完工，共年年底農曆11月初一到初五，同平鎮褒忠亭（義民廟）聯合打醮。後來在97年增起門樓，98年完成，年底12月25～29（農曆11月初10～14），一共五日「打醮尾」，舉辦圓醮。門樓个內外對聯，係請當代書法家，用正、行、篆、隸四種字體書寫，使得仁海宮个藝術完全呈現。
光緒21（1895）年7月30暗晡，日本征台大將北白川宮能久親王來到中壢，睡到仁海宮，同畫有門神个兩扇大門（圖5）拆忒，拿到後殿放到厥个行軍床面頂墊睡。雖然當可惡，毋過也好得因為這層關係，後來在皇民化運動「寺廟神升天」个時節，仁海宮正無分日本人拆忒。毋過當打爽个係，分北白川宮睡過个「門神枋」，本來放到後殿角項，一直用布索仔圍等。在民國50年，日本仁海宮國際關係責任調查團來參訪个時節，得着仁海宮管理委員个同意，運到日本「靖國神社」寶物館保存起來。雖然日本國會議員「森清」同北白川宮後人「北白川道久」也識在民國72年來信感謝「好意承讓」，毋過仁海宮也少忒一項古蹟。還有明治2年大整修時，在廟前起个北白川宮紀念碑，光復過後，到民國35年1月，也分人拆淨淨，看毋着蹤跡咧！
圖5 目前存放在日本靖國神社个仁海宮原來門神枋
（資料提供：劉波榮，徐貴榮1999.6.16翻拍）
本來客家人奉祀个媽祖無像學老人，有一媽、二媽、三媽抑係安地名，像北港媽、鹿港媽、大甲媽這兜个稱呼，毋過這下廟項對外宣傳安到「中壢媽」（圖6），怕係希望仁海宮个名聲傳到還較遠，有恁好个民間人文藝術，做得分更加多人个知，好來進香、欣賞啊！
圖6 新春期間宮前搭起「中壢媽」牌樓，背後係廟前廣場、山門（2023.01.30攝）
附註：本文感謝已過身个前仁海宮常務監事劉坡榮提供資料、口述，並參考下列文獻：
1. 「財團法人臺灣省桃園縣中壢仁海宮」所編輯个《中壢仁海宮建宮二百六十週年慶祝活動紀念冊》（1986.9）、《閱讀仁海宮》（2011.3）、《風華再現 仁海宮（仁海宮190週年紀念）》（2016.5）。
2.「仁海宮 褒忠祠聯合慶成祈安福醮醮務局」編印个《仁海宮 褒忠祠聯合慶成祈安五朝福醮榮典紀念特刊》（1997.農曆11.01～05）。
