媽祖蔭外庄 䗆蜱專食客
【圖／廖千慧；文／何石松】
發音人：何石松（海陸腔）
媽祖蔭外庄，䗆蜱專食客。一般都係認為講，媽祖專門庇佑該別莊頭介人，無麼介庇佑本庄，所以正會近廟欺神；共樣，大家也認為該細隻細隻介䗆蜱，專門食人客，毋會咬主人。事實上，這係一句句中互文介修辭，意思係講：媽祖毋單淨蔭外庄，也蔭本庄；䗆蜱毋單咬人客，也會咬主人，係自家習慣成自然，雲深不知處，觀察有所不明，認知有所不足介關係啊！
媽祖，原旦係宋朝時節，蒲田湄洲出世介不平凡女子，降下來一個月，毋會噭，又毋會講話，所以安到林默娘。佢從細識海性，知海情；會打魚，會泅水，還長扯救咧當多人，不幸在一擺救人介過程中，嗄犧牲咧！民間講佢後來升天變仙，佢不論在生時節，抑係過身以後，都一心一意愛救人，所以大家起廟來紀念佢。從宋朝到這下，佢係分皇帝褒封當多官銜介神明，比論講夫人，順妃，慶妃，聖妃，天上聖母，天妃，天后等等，有無上介光榮。佢當靈顯，毋單淨保護佢介鄉里，還庇佑該天西恁遠介人，係大公無私介，單淨臺灣，就有五百零座媽祖廟，係過加上東南亞等外國，該不得了，正經係媽祖蔭外庄啊！
媽祖蔭外庄，就係慈悲為懷，仁愛思想介擴大，法力無邊，威靈鎮海介發揮。從原旦庇佑漁民打魚介安全，發展到庇佑歸隻海上行船介平安；本來斯大陸原鄉介信仰，化為歸臺灣介信奉，變成一隻海國長春介蓬萊仙島。本來係媽祖，吾俚尊稱佢為媽祖婆，佢毋單庇佑大陸，也庇佑臺灣；毋單庇佑了臺灣鄉親，更保佑了北港朝天宮等，就近介鄉親朋友。各地媽祖廟，都有傳說講：第二次世界大戰，外國在臺灣天頂擲炮彈。有一個美國兵仔，識看著天頂一位著白衫介仙女，當像媽祖，騰雲在空中，用佢介裙仔，承起了炸彈，摎佢掉在海竇肚，救了當多人。
因為媽祖介庇佑，所以，在臺灣，媽祖蔭外庄，形成了一種新興飲水思源介媽祖文化，看該逐年過年過節，媽祖婆轉外家，回鑾，遶境，各地迎媽祖介熱烈活動，連續差不多歸隻月介鬧熱，係世界上三大宗教大事之一，影響儘大。所以，媽祖介化雨群黎，已經毋係限在某隻位所，可以講係慈航普渡，明月當空。
䗆蜱專食客介䗆蜱，又安到床蝨，壁蝨。華語安到臭蟲，蜱蟲。蜱蟲。佢生著像蝨嫲恁大，常常壙在禾稈，眠床草蓆介罅縫肚，好食動物介血，係當得人畏介蟲仔，分佢咬著，該斯有鏖糟齋好食呢！所以，頭擺人講：「䗆蜱狗蝨，像一枚竻；分佢咬著，又㾂又痛，艱苦到耐毋得。」
頭過在屋下，𠊎毋記得有分佢咬過無，抑係分佢咬著無感覺，毋識試著屋下有䗆蜱。但是，在外背識分佢咬著一擺，到今，還記得清清楚楚。該係在一年避暑，參加夏令營活動，在一隻學校介宿舍歇，睡到半夜，榻榻米肚介䗆蜱，全部出來集合，講愛歡迎人客咧，摎𠊎咬到一隻一隻，又㾂又痛，轉去一禮拜都毋會好，想著該烏𪐞烏𪐞，食血食到肚膕膕，打死血就滮出來介䗆蜱，全係出門去正分佢咬著介，正經係䗆蜱專食客，實在得人畏。
𠊎就近有一個歐巴桑，三十年前，識去大陸朋友屋下尞，睡到半夜分歸群介䗆蜱咬醒，又㾂又痛，唉唉喞喞，歸身艱苦虐削，硬硬忍耐到天光，正對主人講這種情形，主人笑笑仔講：「無啊，無啊，哪有恁多麼介䗆蜱，𠊎也毋識分佢咬著」，正經係䗆蜱專食客，主人全毋知。
原來媽祖蔭外鄉，毋係斯蔭外鄉定，也有蔭家鄉；䗆蜱專食客，屋下可能有䗆蜱，自家嗄毋知。總係試著神明慭在該保佑外庄人，䗆蜱專食客也共樣，其實係一種錯誤觀念，這就係久咧成習慣介關係。所謂「摎好人交往，斯像落了花香滿間介屋肚，久咧就無試著香味；摎壞人交往，也像落了滿間臭臊鹹魚介市場共樣，久咧也無試著佢臭。」明明媽祖等神明，年年月月在該保護大家，屋下有恁多介䗆蜱，也像人無看著共樣。較好食介菜，逐日食，乜試著毋好食，正經係和尚無眼，怕係一種「生在福中毋知福」呢！
有萬古千秋功勞介媽祖，還講佢專蔭外庄人；咬人咬到會收命介䗆蜱，還講屋下無䗆蜱，除了表現媽祖介偉大之外，就係所謂「屋簷下介火，專門照別人；燈盞頂介光，照毋著自家。」「向面前行，斯看毋著後影；向東片看，就映毋著西牆。」斯像孟子所講介：「習矣而不察焉。」習慣成自然，看毋著其中介道理，已值得思量。
※本文的「介」為大眾通用的「的」，同教育部訂的「个」之意。
