坐飛機到雅加達
【圖、文／江卓安／國立中央大學客家語文碩士班】
「天正光，跋囥床，自家个行李帶腰旁……」這係自家第一擺去印尼，實在有影快樂，因為係自家有興趣个東西，故所去个時間係講愛做二十點鐘个飛行機也甘願啦！
這係自家第二擺出國，第一擺係去韓國遊尞四日，第二擺出國就大進化到去十四日，還過去到了兩个位所：雅加達還過泗水。雅加達个客家話毋係直接講雅加達，厥个客家話安到椰城，這係對臺灣个印尼籍姊姊問着个，實在還心色。出發个前一日，自家還像一个細人仔，到眠床上揙來倒去，想愛睡又睡毋忒，分自家回憶以前个畢業旅行還像乜係共樣，因為昶期待出國做研究，所以緊想睡又睡毋忒，實在還艱苦。
今晡日朝晨頭五點半就囥床來，正過檢查行李，到了機場發現坐飛行機去印尼椰城个人有一拖拉牯，還好無壓線時間到機場，啊無會等掛行李等到天大光。值得同大家分享个事情還有一个，就係發現著飛行機上，毋單淨講華語做得、講英文做得、講印尼話做得，甚至連講客乜做得，因為飛行機項有當多坤甸同山口洋个印尼姊姊愛轉妹家，故所試著飛行機頂項做得貼一張「𠊎講客」个貼紙了。
坐了愛五點鐘个飛行機，到了椰城，試著全部都無共樣了，不論係馬路个駕駛方向，還係當地个風景，抑係講印尼个路邊攤，都盡無共樣，恁樣个情況單淨做得做一隻動作，就係拿出若个手機仔，緊拍拍拍拍拍，還係講緊錄錄錄錄錄，有兜連鎖商店係臺灣有，印尼乜有，有兜係印尼有臺灣無个，印尼个便利商店就當強、當好遶，做得買冰、做得買一堆有个無个，你想愛食麼个零嗒，該印尼便利店都有。平常時阿姆講做毋得緊食个枝仔冰同涼水，現下在印尼就愛緊食啊！
到了印尼以後最無法度適應个，其實還係語言，毋過用自家个「客氏英文」還過比手畫腳，其實乜已生趣，除忒這，大家還去了在雅加達个「客屬聯誼總會」這係一隻伏筆，到後背會同大自家多多提著哦！去拜會了後，就在該片體驗印尼个客家合菜，實在還好食，有兜同臺灣个客家菜共樣，有兜無共樣，這係一種盡特殊个體驗。
這係到雅加達个第一日，天光日就愛飛到泗水了，這段旅程个故事，還愛繼續寫下去哦！
