有電好用
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
有人恁樣講：
長間過日無過夜，光光暗暗幾千年；
係講一下無水電，毋止罵人合罵天。
話講崖讀初中，開始有自行車好騎，比起行路，屋下到文林中學做得遽加歸點鐘。毋過逐禮拜就有一日愛載重鈂鈂个大電池（badali）去街項灌電，屋下看東西正有電火好用。
見擺放學順續載電池轉屋，銅鑼到竹圍，愛蹶兩條嶇崎，殺力牯箭到手痺腳軟，乜毋敢喊苦。
正開始有電好用个日仔，麼人毋係看著電火就像救著命樣仔，毋使更過點燈盞，一陣風來暗摸胥疏。
生活文明進步个歷史，有三項最驚人个力量：文字、電力同網路。
秦始皇統一文字，紀載歷史文明各項創造成果，上代人个智慧轉交下代人繼續發展，正有今晡日个進步繁榮。
秦朝到二十世紀，兼兼兩千年恁長个時間，正發明比人力增加千萬倍个電動，翻轉歸隻世界个生態，人完全控制動物植物界个生存滅亡。
前世無修个動物植物，仰係這兜人作惡作善、作生作死个對手。
下背講兜仔崖初中時節，有電好用个生活改變。
記得八七水災前一日，該下吂有用電火，暗分落下大斗雨，屋肚入水看毋清，點个燈盞細細蕊，仰知崩山走山打田地，天光開門正知驚，屋舍一半變河壩，過落一時又半刻，爺哀子女變波臣。
當時係有電力用，電火較光照屋邊，知愁知路好逃生。可見電力功能大，雖然早時係用蓄電池，也比柴火、水油、瓦斯、石炭較光較方便，至少電火好處多，風吹雨涿毋會烏，看書做事一屋光。
臺灣經濟起步時，就係全面設置電廠日，工廠有電造產品，製造產業愛人工，鄉下農事用電力，多出人工落工廠，大家有事好做有錢好賺，生活有希望。
想當時，係無電力整工廠，初中畢業無頭路，本本耕田做事做長年，哪有機會繼續讀書，求知識學技術，社會進步生活水準提高。
想當時，係無電力攪泥鋸樹剖材吊鋼架，哪有才調做樓屋。
想當時，係無電力精米、電鍋煮飯、電爐炒菜、電壺煮滾水，哪有白飯好菜又好茶。
想當時，係無電力㓾豬、㓾羊方、㓾雞鴨，哪有便宜淨俐肉好食，也無電力㓾魚切果做罐頭，還過磨粉、做粄、做餅，各種各樣包裝食品。
想當時，係無電力紡織、裁衣、染色做衫褲，哪有燒冷天時，換賁煥薄恁自由。
想當時，係無電力發動，推動車輛機器，哪有辦法十里百里遠，一日半日到。連早期火車燒石炭，巴士用柴油，又乜發電正會行。
其他，打被骨，用電力打勻棉花，做好被骨又遽又好蓋。翕相洗片，改用電力照相，化學洗片，相片又靚又耐看。
吂有電時節，愛攣布鞋，刺草鞋。有電好用，全部電動設計，製皮鞋、靴仔、布鞋、球鞋樣樣有，愛哪款靴鞋，肯買就有好著。無像早期，買一雙鞋，掛在頸根項，毋盼得拿來著。
還較生趣个係，連賭繳方式也跈等電力改變。
崖小學該下，大人過年賭繳，差毋多就係跌三烏、打棋子、剁茶箍。
讀初中，牽電火用電力過後，就有用電切到正正，用電染到黃、紅、白、青个四色牌。
崖讀師範該下，正開始慢慢欸有收音機、電視機，鄉下人个娛樂，也從看撮把戲、看大戲，變聽收音機、看電影、看電視。
前世無修，崖這代人个一生，影響最大个係讀初中時節，生活方式，慢慢仔用電力代人力，省起來个人力，又去研究開發，想出還較方便進步个方法工具，就恁樣，緊變緊變下去。
這兩千年來，盡大个改變，堵堵分崖這代人堵著，算來係幸運抑係命歪，愛問天正知。
還有，現代網路帶出來个新世界，又分崖這代人堵著，算來會變到樣欸？
本本愛問前世無修个天正做得。
詩曰：
天雨粟，鬼夜哭，倉頡創字子孫逐，肯學就有祿；
日不休，夜不宿，電動發明機器轂，天下網路足？
※本文的「崖」同教育部訂的「𠊎」之意。
