阿姆
【圖、文／劉書瑀／苗栗縣市頭份國中教師】
發音人：劉書瑀（四縣腔）
後來𠊎正知，毋係逐儕个阿姆就共樣。有兜阿姆惜子如命，毋盼得子女做着事；有兜阿姆自家就濫濫糝糝，莫講愛仰般好好渡細人；有兜阿姆煞猛打拚，就為着分大細盡好个環境。
吾姆係做紙擘个。
阿姆後生開始摎阿舅鬥股做紙箱，該央時臺灣經濟搞到當轂（如火如荼），逐日尾勞尾掣。𠊎讀个幼稚園就在阿姆工廠對面，放學時先生牽𠊎行過大路就到了，從細𠊎就看等阿姆做事：擎紙擘、切紙、釘箱仔，細人仔試着盡生趣，較大兜仔就好擳擳仔想愛𢯭手，工廠裡肚个阿伯婆就教𠊎仰般摎細紙箱拈共下、仰般用機器捆起來。朝晨去學校讀書，下晝轉來𤸁仔就搵到紙擘項睡目，𠊎做得講係在工廠肚聽等機器聲長大个，幼稚園、小學、國中……毋多知仔，一年過一年，𠊎乜異有力做得𢯭擎紙擘了！阿姆哀，頭擺試着好搞个事物，原來做起來會悿死，正經想毋解阿姆仰做得透日仔企等、跍等，無晝無暗个做牛做馬，三不五時就愛加班到三更半夜，轉到屋還有大大細細等等食夜。阿爸係食月給个，因為係長孫，從細就分阿婆太縱到大，麼个家務就毋會做，看等阿姆日日無閒洎杈，乜摎佢無相干樣仔，莫講做家務，成時連照顧𫣆兩姊妹就難。
𠊎盡記得有一擺，阿姆趕工著晝晝暗暗，𠊎乜毋知做麼个臨暗頭還留在工廠，看等外背漸漸仔烏陰下來，阿姆一片用釘車釘箱仔，一片陪𠊎寫作文，𠊎寫字个桌仔就係倒貶个紙箱，兩子哀共下在昏黃个電火底下熬更守夜。
阿姆毋單淨做頭路辛苦，做心臼乜係千難萬難，係講堵着無管事个家官無毋著，毋過也難耐家娘个刁蠻。吾婆歸日咒孤罵絕、呻生呻死、唉唉唧唧，確實分人忍毋核。高不將搬出來歇，一家大細過加一个老人家，無毋著，阿太也跈過來欸。恁樣勞碌个日仔一日過一日，該載阿姆性體良善，一溜里來做麼个事就異順序，就像佢自家講「善有善報」，存好心、做好事，下擺堵著艱辛个事，自然有貴人相幫。
這幾年看等阿姆白白个頭那毛，想着還細該下，阿姆不時會講「挷一條分一个銀」，現下愛尋一條烏色个怕就異難了。
