厥公還吂有退休
【文／邱一帆／國立中央大學客家研究博士班】
發音人：邱一帆（四縣腔）
厥公講佢自家到今吂有退休……
當多年前，佢對台東轉到童年个故鄉，紅毛館教書。自家長（diongˇ）有兜吔錢，就在祖先留下來个老屋跡，加買一垤地，新起一間做得遮風抵雨、分屋下人燒暖个屋仔。有一日暗晡，佢在自家眠床頂睡目，睡到當入覺个時節，有一儕人嗄行入吔厥个夢裡肚，夢中相認，原來該儕人就係厥个阿公。
厥公講：看着孫仔轉來自家个故鄉，教自家个鄉親子女，做阿公个當歡喜，乜當光榮。還提醒自家个孫仔，愛好好仔教書，提升自家个能力，認真指導學生仔，痛惜自家个學生仔，為學生仔个未來煞猛打拚。佢有兜仔着驚，乜試着當怪奇，做麼个厥公會到夢中，來尋佢講話，這係自佢出世以來，都毋識有過个事情。
厥公續等就同佢講：阿公乜識在紅毛館教書，毋過到今啊，就還吂有退休，毋知愛到哪時，正做得退休轉屋下，做得拜托孫仔無？做得拜托孫仔同阿公辦理退休無？一聽啊着厥公恁樣講，做孫仔个就試著當疑狐，算算啊，阿公乜有歸百歲恁老吔，做麼个既經過身當久个阿公，到這下還吂有退休呢？
厥公講佢自家乜毋知！毋過，厥公盡記得該年該日，該時在學校教等書，毋知哪位來个特務巡查兩三儕，問着厥公个名仔，一下就同佢帶走。一上車，佢兜就摎厥公个目珠蒙等，經過怕有幾下點鐘，等到厥公擘開目珠，就看着對面坐等武頓武頓个人，同佢問話。
講麼个厥公係共匪，乜係共產黨个共路人，密謀叛亂……，厥公完全無反駁个權利。對該央時開始，厥公就無轉屋下，乜無再轉到學校，當然乜無親身到學校辦理退休。故所，行入自家孫仔个夢中，請孫仔同阿公𢯭手辦退休。
到今，退休个手續還吂有辦好勢，厥公三不二時會行入夢裡肚來問佢，進度到哪咧？
