部定本客語教材
【文／鍾榮富／南臺科技大學應用英語系講座教授】
發音人：鍾榮富（南四縣腔）
因爭本土教育推動委員陳秀琪教授个提案，希望教育部出面為客語教學編一套客語教材，至少愛六腔頭(四縣、南四縣、海陸、詔安、大埔、饒平)兼顧，正毋會讓少數腔無教材。教育部接受提案，委託台南大學个張惠貞教授來承辦。張教授雖然毋係客人，毋過佢一向俚來承辦中央團(本土語言教學輔導團)个工作，同時佢又兼辦本土語言沉浸式教學个計畫。再講客語教材除了編輯以外，還愛兼顧出版(包括校對、插圖、排版、運送)，故所國教署最後將這个工作委託佢來承辦。
張教授確定愛接這項計畫之後，廣邀客語教學个先輩、賢才、學者、先生共下來商量，討論出編輯方向，同時邀請本人來承擔總編輯个重擔。堵好𠊎正對南台科大退休，本來計畫愛放空一切工作，好好看書，寫兜同語言學無相干个文章，無愐着佢會尋着𠊎。其實，𠊎同佢推薦了不少有經驗，有擔當个人選，毋過最後經過種種風波，𠊎還係㧡下這個擔頭。
對2019年九月到2022年七月共有十三隻月个時間，編輯團隊愛出版48本書(國小4冊[課文兩冊，教學指引兩冊]，國中2冊，高中2冊，每一冊愛印六腔)，最後都完全準時送到各學校，總共印了一萬零冊書，可見受歡迎个程度。其中國小个課本還加印了兩擺，正符合學校个要求。這本客語課本同過去版本無共樣个所在，最少有兩點。第一，所有國小个課文都係對話，目標就係愛分學生仔學着个客話，就做得直接講出來，做得用着。國中係三階段之間个橋梁，故所採用散文同對話个模式。高中所有个選文都係成名作家个作品，這種安排就係希望高中生有機會認識客籍作家，了解客家作家个重要性。第二，每一冊「教學指引」都經過設計，帶等客語教學方法同文句結構分析，屬於理論同實務兼顧，理想就係愛分教書者了解每一課个重點、句型，讓未來个學生仔做得透過文法結構產生當多个句仔，避免教一句就學著一句个模式。
目前在進行國小第三、四冊个編輯工作，到這隻月(2023, 01)為止，做得講所以个編輯工作就完工了，還在進行个就係校對、改稿、修改等等工程。
回首這兩年个工作，能夠恁順利，能夠如期完成大部分个編輯職務，愛感謝劉明宗教授个添手。最感心个係同𠊎等審查、尋問題、捉要領个前輩、學者、同現場个先生。你等个用心同耐心讓可能發生个問題消失，讓編輯人員無注意著偏失、用詞、寫法有機會修改，有時間整修。同時乜愛感謝各腔个代表，盡心盡力來做腔頭之間个對譯。這係十分困難个工程，需要耐心，還愛多少了解个腔同四縣腔之間个差別。對譯過程之中，代表人員又同可能帶來誤會个用法、寫法修改到當理想，避免了種種可能个困擾。另外，各腔个錄音教師更加值得感謝，佢等細義看詞，一片看課文，一片念出來，聲愛正，腔愛圓，實在不容易。
