1222鄭福運演講心得
【文／江卓安／中央大學客家語文碩士班】
客家人除忒臺灣、中國大陸以外，哪位做得看得着呢？𠊎會回答：在全世界都有客家人，若係愛過較細个範圍个話，該就係東南亞地區了。
今晡日芬芳先生邀請著鄭福運先生來演講瑪琅：一個在爪哇个城市个相關講座。分𠊎試着較心色个係，鄭福運先生係印尼个學者，佢現下還係博士生。還過今晡日个演講係線上舉辦。摎上隻禮拜邀請个Vollman先生个現場演講無共樣。這之間發生个一隻意外就係，鄭先生佢當晝同厥先生meeting有宕着時間，故所今晡日个演講有較慢開始，做得想像以後假使𠊎讀博士班敢會恁樣無？
演講个內容一開始係對瑪琅个人文社會，還過地理環境來去做一隻介紹，嗄落來就切入探討過討論這內部个種種問題，分𠊎試着較生趣个就係，一个文化愛來展現，就係透過語言，像𠊎在上課以前在寫一份報告，係摎臺灣个新住民阿姊有關个，𠊎想愛透過以前去訪問厥兜个音檔，來去講一息仔問題。𠊎看着這兜共樣係來自印尼个新住民阿姊，佢兜个語言展現實在得人驚，這兜阿姊會講恁多種个話，無單淨係現下講个華語，還過自家个母語：客家話。假使佢有在外背个公司上班个話，嘛有可能會講一滴仔福佬。恁樣个多民族並立个情況，分這兜阿姊愛學當多語言在印尼係一隻情況，毋過在臺灣毋係，在臺灣係：你可能單淨會講華語一種語言，假使會客家還係福佬个語言，可能單淨會講該種語言个了少話。
演講肚，鄭先生佢展出當多瑪琅个相片，有當多當像廟个相片，可見該片華人个人數可能毋會少哦。還有瑪琅个食物，看起來都還好食，口涎水緊跌下來，希望到時去印尼个時節做得食着這兜食物。
還過分𠊎印象較深个就係鄭先生紹介到爪哇个時節，聯想着了芬芳先生上課時節个書，該書名安到《幽靈船》，書裡背講个故事就係摎爪哇信仰、人民生活有關个故事。裡背肚有一個故事係講灶爐君个細姐，該劇情摎電視機頂高个八點檔共樣，大婆同細婆為著老公，互相算計等等个劇情，毋單淨在臺灣做得看得着，在爪哇乜做得看着。
最尾，承蒙鄭福運先生來中大客家學院來演講，分課堂个同學收穫盡多，勞瀝鄭福運先生。
