新竹寶山水庫遊記
【圖、文／羅寶貴】
發音人：羅寶貴（四縣腔）
尋非尞日行路去 寶山水庫遶尞趣 樹仔遮日盡涼爽 經過寶湖吊橋靚
人多吊橋盡搖晃 秋風吹起水明朗 湖光山色恁自然 遠山倒影水面清
雲淡風輕景色靚 看着魚狗目金金 水面頓恬樹枝企 望向遠方恁孤栖
恬靜不動尋獵物 歸群魚仔相賽泅 相爭泌背覓食趣 尖嘴長長啄水面
等待魚仔泅過來 目標精準食落肚 把握機會顧肚腸 心情暢樂歡喜連
翼翍翍仔飛上天 低飛天地盡逍遙 食飽飽就無留戀 龜仔探頭日光晒
另隻慢泅已好搞 看著兩子爺在該 吊橋上放魚勾下 想釣魚仔無恁該
吊橋就晃來晃去 敢會釣得著魚仔 實在好笑盡疑狐 應該係釣生趣个
沿等邊脣步道行 欣賞靚景盡舒心 公婆談心話家常 這條路線盡多人
來到另片分叉路 碧湖吊橋盡大條 做得汽車通過這 涼亭坐等一兜人
問路順續打嘴鼓 左片路尋水源頭 右片去寶二水庫 路線試着盡餳人
決定去尋水源頭 又行一段路程到 蹶崎盡竳好漢坡 忽見機車催油門
最遽速度上崎去 嘴擘擘目盯盯看 有影厲害順利上 再來下崎乜食力
欣賞週邊湛景色 緊行遠看水沖聲 心肝歡喜遽翕相 白雪雪滾落水庫
繼續前進尋源頭 堵着耕種老阿伯 種有苦瓜蕃薯葉 輒有山友喊佢賣
細苦瓜一條十銀 賣有叁仟零個銀 實在還慶恁會種 客話打嘴鼓歡喜
了解山項種菜事 阿伯實在盡熱心 指引源頭仰般行 有影不遠處出現
有人旁脣練氣功 阿伯講佢日日來 為着康健練身體 滾滾大水直瀉下
清新涼意心肝肚 難得一見水源頭 湛聲連連實在暢 盡毋盼得正離開
這擺尋著湛所在 總愛來寶山水庫 定著行來看水沖 行路運動心情好
試着人生無幾長 食睡尞得係希望 輒遶山花較長命 人生苦短有悲歡
總想美好莫怨嘆 日頭落山毋停留 只記快樂忘忒愁 痛惜當下愛把握
