蝲䗁，飛絲
【文、圖／彭欽清／國立政治大學退休教授】
發音人：彭欽清（四縣腔）
老時人講：黃蚻愛人富，蝲䗁愛人窮。意思係講有錢人家食來好，食毋忒个東西多，黃蚻儘採就有好食；窮苦人家雖然無麼个東西好食，毋過屋較陋肖，內外就做得牽絲結網，會有烏蠅、蚊仔、蛾仔飛來黏著，食到戽毋開。
屋肚个蝲䗁絲無恁黏，樹林肚个就無共樣，蝲䗁較大隻，牽个絲網較大較主固又黏，黏得核揚蝶仔、揚尾仔、草蜢這兜。
這種蝲䗁看起來已得人驚，結好網會囥在網中央。等黏著个東西緊奮命該下，佢就會沿等絲爬過去咬，厥嘴有毒，分佢咬着个毋係昏就係死。佢係肚吂飢，就會倒轉去網中央，等想食正來食。
做細孲該下，熱天盡輒去黏馬牯蟬。先拿一支細竹枝仔去樹林項徑蝲䗁絲，將徑着个捋到竹枝仔尾項變一細團仔，膏兜仔口涎水落去就會當黏。聽着哪有蟬仔叫就跈聲去，忒高个黏毋著，愛黏較低个，黏着个會唧唧滾大聲緊叫。係好彩，一晝邊捉得著歸十隻仔。
這種蝲䗁絲網無徑淨抑係分鳥仔抑麼个撞壞忒，絲就會垂下來跈風飛過來飛過去，這就係飛絲。人係毋堵好行啊過分飛絲打著目珠又去擂佢，該就死該了。飛絲合著目珠肚个水會黏核，目珠就會又紅又腫，點較多目藥乜無效。
吾四哥有一擺就分飛絲打著，緊流目汁，目珠紅紅腫腫，食睡毋得。有人報講，揙開目珠下瞼，用毛筆將擂好个墨水輕輕仔點落去，就會看得著飛絲，正挾出來。𠊎同吾姊照等做，搣了點零鐘，有看著飛絲就係挾毋出來，害吾四哥汗溚溚跌，緊喊佢佇毋著了，𠊎兩儕正停下來。
第二日，有人喊吾姆泡一碗公个釅茶，趕茶燒燒，拿一條搵溼个面帕蒙等碗公過吾四哥个頭那，吾四哥嘴項含等一支細竹管仔，緊歕碗公肚个茶，講啊已奇，無幾久仔，飛絲就自家流到碗公肚，吾四哥个痛難正煞。
這下个醫學恁發達，正經係分飛絲打著，去分眼科先生看一下仔，兩下半就怕好了。該央時个莊下，莫講眼科，連西醫就無幾多間。毋係恁樣，吾四哥就毋會食恁多屙糟齋了。
