六龜堵著南北客(下)
【圖、文／鍾孝昇／桃園市中壢區龍岡國小教師】
發音人：鍾孝昇（四縣腔）
對六龜市區出發，巴士順等大路，經過十八羅漢山，差毋多十分鐘个時間，就開到六龜另外一隻客家庄──「新威」了。
新威係六龜个一隻里，位在六龜南片，隔一座茶頂山摎美濃合界，同時乜隔一條荖濃溪摎屏東高樹相對望，到今還係一隻傳統个客家庄。新威在乾隆五年（1738年）開庄，該央時安做「新民庄」，摎新興、新寮共樣係六堆客家先民，順等荖濃溪開墾个最北片，係六堆當中个「右堆」。
一下車，在新威看毋著鬧熱个街市，只有幾間屋仔，孤栖起在大路脣項，係一隻當恬靜个細庄頭。𠊎跈等網路地圖个導覽，行入一條細路，黏時就看著一間當大間个「聖君廟」，再經過一坵檳榔園，就到了新威个信仰中心--「勸善堂」。
有關勸善堂个歷史，就愛對清朝時代講起。乾隆五年，從唐山渡海來到這个先民，因為受著天年倒貶，還有外族个欺負，故所就想愛來起廟，保佑大家做得安居樂業。經過眾人多年个打拚，在善男信女出錢出力支持下，勸善堂在1924年起建，幾年後，正殿泥磚屋崩忒，由楊阿壬堂主規劃，1939年改建成磚仔屋。勸善堂起建該央時，對美濃廣善堂分爐，恭迎三聖公來這奉祀，既今就會有百年个歷史。
聖君廟个起建，摎勸善堂有差毋多个歷史背景，毋過聖君廟係對美濃九芎林聖君廟割火个，恭迎張、蕭、劉、連諸聖君奉祀。聽講二次大戰該央時，有當多空襲个情形發生，該載有聖君施法護民，分炸彈歸个落入河灞，毋傷著百姓。
在新威客家莊，本旦就有清明過後，祭拜義塚个風俗。勸善堂起建後，就摎敬義塚、送字紙灰結合。逐年舊曆三月初七，聖君廟張君聖者聖誕日，舉辦「祭河江、敬義塚祭典」，用來保存客家傳統信仰，相續新民庄頭擺个風俗。
𠊎在勸善堂參觀該下，主委潘瓊華先生乜來到廟坪。潘主委表示新民庄在荖濃溪脣，長年透天不時會做大水，田地輒輒分水打淨淨，故所歸莊人對掌管河壩个神明十分尊重。逐年三月初七，大家都當誠心，準備牲儀，恭迎神明到荖濃溪脣鎮守，同時乜用祭品，超度河壩肚往生个亡靈。」
「除忒荖濃溪脣个祭河江活動，在聖君祝壽儀式結束後，大家還會去到『集孤薗』祭拜義塚，分無嗣个先民，享祀人間香火。」
聽了潘主委詳細个解說，分𠊎感受著新威這位个客家鄉親，毋單淨對自家族群文化个保存當有心，對人情義理、敬天愛人个傳統倫理乜當重視。新威，確實係一隻完整保留客家精神个客家庄。
勸善堂主任委員潘瓊華先生詳細解說廟个歷史
帶等淰淰个感動，離開勸善堂，續下來，𠊎來到這間有百年歷史个新威國小。
新威國小係新威這位唯一个客庄小學，因為學生仔大部分都係客家子弟，故所學校摎客委會申請成為客語生活學校，毋單淨鼓勵學生仔在畢業前，都愛通過客語能力初級認證，乜舉辦當多活動，傳承客家文化。像今年新威國小个客家舞蹈團隊，就獲得全國學生舞蹈比賽，高雄市初賽「特優」个成績，實在當湛斗，當登真。
學校肚有一頭七十年个吉貝木棉樹，這頭大樹有五十公尺高，高到分荖濃溪對岸个人乜看到清清楚楚。毋過，這幾年因為風搓還有發病个關係，樹仔个生長受著影響。該載大家共下𢯭手，分佢還係竳竳企在運動坪邊脣，舊年還得著「全國盡靚校樹」个名聲。
行在學校脣个大路項，望著這頭榮榮大樹，𠊎試著新威這位个客家鄉親，就像這頭大樹共樣，雖然受著四圍不同族群个影響，分客家文化漸漸有沒落忒个危機，毋過大自家還係共下煞猛打拚，相續客家傳統精神。
愛離開新威之前，𠊎企在路脣个「水圳恩公廟」面前，手擎清香，誠心來拜這位親手開挖水圳，灌溉新威二百零甲田地个黃仙人。想著這擺登山隊三日兩夜南橫个旅行，雖然無辦法摎大家共下去遶尞，毋過「因禍得福」个行程，嗄分𠊎認識著南、北客家人，在六龜艱辛開墾个歷史，乜分𠊎過較體會著「食水愛念水源頭」這句諺語。在「水圳恩公廟」个面前，結束這擺个旅行，𠊎心中充滿了淰淰个感謝。
新威國小面前个「水圳恩公廟」，奉祀開挖水圳个黃仙人。
