伯公岡花燈
【文、圖／富岡 邱鴻春／國立中央大學機械工程學系碩士】
富岡舊名伯公岡 偎音偎音擘光光
正會老名來改忒 希望發揚客家莊
雖然頭擺係恁樣想，但係經過幾十年，在這最南片个富岡，本本還係桃園裡肚，盡落後个位所，有老人家講，鳥仔就毋來屙屎。
好得八年前，桃園縣升到市以後，正開始有在富岡辦地景藝術節還過鐵道藝術節，慢慢仔，正有多少人，小可仔知有富岡這隻地方，再加上這兩年半來，有富岡在地个創生基地，富富˙小山岡，有一群後生人个打拚，不但輒輒辦盡多客家相關个活動，還有翕客家紀錄片「發粄」，得著二零二二年桃園客家短片培訓計畫競賽第三名，又還較提升富岡个知名度，正分政府機關摎(同)民意代表注意著。
二零二三年个桃園燈會在富岡，係所有民眾想就無想過个事情，感謝楊梅在地四位議員，無分黨派全力支持桃園燈會辦在富岡，總算這擺伯公岡人做得企起來咧。富岡个桃園燈會係唯一个客家燈會，新曆二月初一到二月十二總共十二日，展區係在富岡个運動公園、伯公岡公園、民生陂、富岡火車頭摎(同)脣頭街區，有主燈、傳統燈、藝術燈還過融入客家、鐵道、茶米這兜在地意象个燈來所組成，歡迎所有个好朋友，日時頭來遶尞恬靜慢活个老街文化，食百年老店个薑絲炒粉腸，還有農會經營个伯公岡25號糧倉，主推个仙草相關產品，係最新个桃園二號品種，有最香个仙草味，摎(同)關西个完全無共樣喔，食過好料後，暗晡頭來看靚靚个花燈，係毋係有當充實个一日。
交通个部分，你做得自家駛車來，毋過愛停在脣頭湖口鄉个中國科技大學裡肚，正安排公車接落來。最建議个就係坐火車來，坐到富岡火車頭下車，一下車在月台頂，就做得看著一兜藝術裝置，你就感覺得著，完全無共樣个伯公岡，火車頭一出來，呈現在面前个，就係大型个花燈，接等透路仔，就做得看著燈籠滿街，毋使愁你毋知路，跈等燈籠行斯著咧。
桃園燈會在富岡 火車方便盡適當
新春來尞喜洋洋 人客轉去滿穀倉
主燈FUTU未來兔在富岡運動公園
