中壢仁海宮个人文藝術風華（上）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
中壢「仁海宮」（圖1）座北向南，目前開五門，係四進四院加山門个格局，因為位在中壢新街國小脣項，延平路鬧市邊，故所，民間就安佢「新街廟」。
圖1 中壢仁海宮近照（2011.08.18攝）
根據仁海宮廟項資料，清朝道光6（1826）年這年，強烈風搓吹過，田園受着傷害，又發生閩粵械鬥，地方人士宋連三同總理傅盛乾這兜仕紳，就召集「澗仔壢（中壢本名）十三大庄」人世起建觀音亭，奉祀觀音菩薩，祈求保佑地方平安。後來因為商業發展，人口增多，去北港朝天宮恭請媽祖分香轉來，同觀音菩薩共下奉祀。道光18年得到地主王天球个捐地，開始動工起造，到道光20年8月初8落成，分前殿、後殿，以媽祖做主神，變到媽祖廟。
「仁海宮」後來經過多擺个修整，特別重要个係清朝同治10（1871、辛未）年、日本昭和2（1927、丁卯）年、民國56（1967、丁未）年、86（1997、丁丑）年、98（2009、己丑）年這恁多擺个大修整完成，經過打醮、圓醮，這下歸隻宮廟个園區差毋多完成吔！有山門、鐘樓、鼓樓、前殿、正殿、後殿、聖蹟亭。正殿奉祀主神媽祖娘，左有千里眼、右有順風耳、前有中壇元帥，左龕三界爺，右龕注生娘。後殿一樓主神沈香媽祖、左祀玉身媽祖、右祀藥師佛。二樓前殿主神關爺，左龕五穀爺，右龕文昌爺；後殿主神斗姥元君，左祀財神爺，右祀月老星君，兩側有六十甲子太歲。三樓主神觀音菩薩，左龕文殊菩薩，右龕普賢菩薩。故所，這下仁海宮毋單止係佛、道、民間信仰个中心，厥个楹聯、石雕、剪黏、交趾陶、龍柱、彩繪這兜个作者，還係一時之選，係一間當有人文藝術風華个宮廟。
講着這人文藝術風華，首先就係牌匾，盡早係同治10年第一擺修廟時，中壢眾街庄敬獻个牌扁「海國長春」、「慈帆普濟」，這下掛到主殿頂高个「海國長春」（圖2），傳講係建宮總理庠生王國華請當時中壢舉人余春錦所題个。過欸在大正1（1912）年敬獻个「瀛海蒙庥」，大正6年个「恩覃海國」、大正8年中壢舉人余紹賡題个「澤遍羣黎」。昭和2年，中壢秀才吳榮隸敬書个「坤德配天」、李逸樵敬書个「后來其蘇」這兜牌匾。
圖2 仁海宮歷史最久个牌匾「海國長春」，掛在主殿頂高（2023.01.16攝）
在這位看得着宮廟同文人个結合，就係昭和2年第二擺修整該當時，請中壢秀才吳榮隸主持，中壢个文人，也係書法家，參加宮廟个修整事務。前殿三川門个中門對聯「仁里迓庥祥十三庄彌殷崇報 海疆慶安謐億萬戶共仰聲靈」係吳榮隸敬撰，林知義拜寫个（圖3）。對聯「仁宇久帡幪羽化湄洲靈有跡 海邦叨蔭庇神依中壢福無疆」也係吳榮隸敬撰个。龍門對聯「仁宇風調黎庶蒙庥懷后德 海邦波靜航檣利濟送神功」係劉石富寫个。虎門對聯「仁風揚福地之庥母恩廣佈 海國得慈航而濟后德普沾」係吳榮隸撰、劉石富寫个。兩片龍虎堵對聯「仁登壽域聖挽狂流中外宅人天其大 海渡慈航母稱濟眾壢徯我后來蘇」係請臺南秀才、書法家羅秀惠撰合寫个。這兜留下來个作品，分後人知得當時个盛況。
圖3 中門對聯、石雕（張秋成作）、牌匾、正殿主神媽祖（2023.01.16攝）
