一龍治水 風調雨順
【圖／廖千慧；文／何石松】
發音人：何石松（海陸腔）
一龍治水，風調雨順，係講堵著一龍治水介年房，該斯會風調雨順，國泰民安介太平日仔。恁堵好，2023歲次癸卯介民國112年，就係當難逢著一龍治水介好年份，又係閏月，又係雙春，所謂「三年一閏，有閏百事順」，希望大家都能夠「東南西北方方利，春夏秋冬日日安」介「天和地和千家和，日順夜順萬事順。」
仰般一龍治水，就會風調雨順？先來了解麼介安到一龍？所謂龍，就係人才介象徵。聽講堯介哀仔，安到慶都，有一日，狂風大水，雷公並拚，𥍉爧滿天，慶都摎天頂赤龍互為感應以後，懷姙14隻月，就降了堯，所以講，吾俚就係龍介傳人。上早時代，人類生存環境艱難，為了解決生活困苦，就想著愛向大自然學習，拿12種動物來做師法介對象。斯有該龍，係兼資其他11種動物所有介才華摎智慧，係嶄蠻特殊介人才，係講由佢來負責國事，係一等適當介。
不過，做毋得麼介事情由一儕來㧡，所以，斯用12生肖來輪，一種動物一日，佢兜，由12地支介子丑寅卯來代理。因為，治水介任務等重，就由龍來擔任。仰般看幾多龍來治水？可以從年初一開始算起，年初一係辰，該年就係一龍治水，年初八係辰，該年就係八龍治水。2022虎年，就係八龍治水，八龍係多龍，多龍懶治水，就造成了旱澇不均，毋係水災，就係天旱；毋係當冷，就係當熱，多龍治水，就係這下所講「極端氣候」介意思。
一龍治水，正經會風調雨順無？其實，二十零年來，毋識有一龍治水咧。上擺一龍治水，係在1997年，過向前去係1993，1991，1990年為一龍治水，這幾年全無麼介災害，尤其堵堵好係民國七八十年，台灣經濟當發展介年代，不論國家或者係個人，麼介都當順利，特別係1990，1991連等兩年一龍治水，可以講係風調雨順，國泰民安，五穀豐登，滿廳都係繁榮景象，到這下，大家還在該手攀綠竹──想對想啊！係毋係能夠再來一擺？
該2023年一龍治水，可能風調雨順無？首先看在年下，各地抽出介國運籤，全部都係儘好介籤：比論講，龍山寺抽出介籤詩係「一鋤掘地要求泉，努力求知得最先；無意俄然遇知己，相逢攜手上青天。」係毋係有一種「開捆棉花──一身鬆」介感覺？
在陽明山姜太公道場所抽出介國運籤，也係上上籤，籤詩講：「玉出崑岡石，舟離古渡灘；行藏終有望，用舍不為難。」這表示烏雲漸漸散去，鬱卒慢慢化解，斯愛知好抓捉蒂頭，知重輕，知孔竅，不論仰般做，都會百事順利介。
最早抽出介係五甲關帝廟介國運籤，也係上上籤。籤詩講：「癸子含香振大同，卯仁守義樂春風；年年新韻多如意，玉兔呈祥百業隆。」這正經講出了兔年介新氣象，尤其掌握了玉兔介善良柔順，居安思危，知有退路，吉祥如意，實在係好頭彩，表示一龍治水，正經有國泰民安介氣象，係毋係像十二月介甘蔗兩頭甜啊！
毋單淨恁樣形，2023一龍治水，還係闔家團圓介一年，因為，有13隻倈仔介家庭，流浪在外背介倈仔轉徠咧，一家幸福團圓介閏二月，係毋係國泰民安？何況，又係雙春，雙春兼閏月，雨水多到絕，斯毋會有天旱介愁慮啊！
但是，話講轉來，凡事吉中有凶，凶中有吉，吾俚還係愛居安思危，雖然雙春當有春，所謂「雙春夾一冬，十隻牛欄九隻空」，還係愛好好預防禽流感，新冠肺炎介流行，「知得孔竅，打得鬼叫」，使得一年四季行到哪位都平安順利，發揮一龍治水介專業摎熱情，正經做著風調雨順，國泰民安！
※本文的「介」為大眾通用的「的」，同教育部訂的「个」之意。
