新竹市郊青草湖
【圖、文／羅寶貴】
發音人：羅寶貴（四縣腔）
細人時節 跈阿哥壩下戽水覓蜆仔打水漂仔捉蝦公魚 盡好搞
小學時節 阿姊帶等𠊎趕去壩頂高看司馬玉嬌拍電影 當生趣
國中時節 𠊎生日邀請同學在水庫划船比賽麼儕較遽 盡歡喜
高中該下 陪伴同學坐堤防邊看湖面景色安慰傷心事 還衰過
做事該下 輒輒經過水庫望水面波光正騎去科學園區 盡順眼
嫁人該時 三大節轉外家食飽後摎屋下人去環湖行路 當康健
同事有問 青草湖有名焙煙腸在哪位請假半晝邊去買 食當暢
有盡多年 水庫塞著當嚴重各處薸仔淰歸湖面看毋得 得人惱
最近幾年 市府決心整治怪手挖濫泥清除薸仔面貌新 恁湛斗
感恩市政府用心 重新開放好去處 故鄉个水實在靚
遊人重回這行尞 立划槳摎天鵝船 映月橋接于飛島
整體造型有特色 青草湖分𠊎快樂 歡喜分享運動地
滿足感心个歲月 青草湖脣胞衣跡 往往愐想頭擺事
得人惜个青草湖 如今又見湖面靚 天轉笠嫲花恁湛
市府規劃休閒地 分人遶尞非常慶 恬靜舒心好風光
盼望湖水張淰淰 菁菁綠水好風景 儕儕樂線遶山花
