蘭花
【圖、文／徐佳妤／臺北市國小客語支援教師】
發音人：徐佳妤（南四縣腔）
「嫁分頭家，一句，跈等去，吂識想過到底嫁吔著抑毋著? 灶頭鑊尾，顧等老嫩，針頭線尾，連等大細…」無意間聽著溫尹嫦小姐唱个「過山」，裡肚這幾句歌詞嗄分𠊎想起——阿姆。
壬寅年正月，歸屋下人愛對臺北市个販仔屋徙到新北市，搬屋該日，看着陽臺項七、八盆个蘭花，「老妹，你愛帶幾盆吔歸去若屋下種無？」「無所在好種呢。」老妹應講。這花，係阿姆進前過年歸竹田外家，同舅姆討个嘉德利亞蘭，每擺十到十二月都會開花，阿姆係看著蘭花開吔，心情就蓋歡喜，會同屋下人講：「𠊎種个蘭花開咧！恁鬧哦！」該時想無，做麼个阿姆會恁中意蘭花? 好久吔正知，佢看着蘭花，就想著竹田个外家，這下，𠊎看著蘭花，就想着阿姆啊。
圖一：種在社區樹項个嘉德利亞蘭
因為家具同電器堵堵好塞入兩臺搬家个車仔，恁多盆个蘭花放毋落車頂，愛仰結煞？下後，𠊎就問新屋个管理員劉先生，佢講：「你帶過來，毋使花缽仔，有一戶人家佢會種花，交分佢。」故所，係有去舊屋整理个時節，𠊎就同蘭花定定吔用鏟仔挖起來，去一轉，就帶一、兩頭蘭花坐捷運轉公車歸新屋，來來去去三、四到，總算……做下同「思念」帶歸來咧。
圖二：竹田舅姆種个蘭花（白色）
這兜蘭花在辛丑年，一頭頭就種在社區花園个樹項，今年十一月下課歸來，看着一頭樹項个蘭花開咧！心肝頭蓋暢樂。想着自家每日赴教課，歸來又煮食，無閒洎杈屋下事，花，係麼个時節開个？無人知。𠊎，用手機仔翕下這兩蕊花，當初因為毋盼得這兜蘭花，今嘎，正有機會過看著佢，開——花。
嘉德利亞蘭个花語：你蓋鬧、敬愛、優雅。嗯，這花，緊看緊像阿姆溫柔个笑容，守護這社區、惜等𠊎等个屋下……。
圖三：竹田舅姆種个蘭花（吊菜色）
