流麻溝15號个聯想
【文／邱一帆／國立中央大學客家研究博士班】
發音人：邱一帆（四縣腔）
對中國走難來个統治者
聽着共產黨就驚到湢湢掣
若係看着共產黨
就像看着鬼樣
定著抓起來銃殺
就算看着个係幻影
乜係圖謀顛覆政權个叛亂份子
乜愛煞煞抓起來
逼問、拷打、苦毒、認罪
勞動改造，思想改造
無聽話个，無法度教化个
槍決可也
擎等反共个大旗
喊起救國个口號
這思想，逐儕愛共樣
這信仰，逐儕愛共樣
這行動，逐儕愛共樣
總係厥个民主
毋係大家个民主
總係厥个自由
毋係大家个自由
在厥个世界
無共樣个思想
無共樣个信仰
無共樣个行動
定着係共匪个共路人
定着係想愛推翻厥政權个人
在厥个世界
你想仰般都做毋得仰般
在厥个世界
佢想仰般就做得仰般
人權，佢講个正算
人道，佢講个正算
生死，就揢到厥手頭項
後記：看過電影流麻溝15號，深深感受白色恐怖該央時个統治同管訓。
