上下兩字个字音字意演變
【文／范文芳／國立清華大學中國語文學系退休教授】
發音人：范文芳（海陸腔）
一、字形討論
1. 上下兩字都係六書中个指事字，標示方位，上指頂高，下指腳下。
2. 現代漢字寫做上下兩字。
二、字意演變
1. 上下兩字本為方位名詞，如天上、地下、街路上、店亭下。
2. 上下兩字抽象化為形容詞，如上古、上等貨、下級、下賤。
3. 上下兩字抽象化為動詞，如上學、上班、下山、下車。
4. 上引申為副詞，有非常个意思，客語上盛，意指過分驕縱。
三、客語上下兩字字音變化特別多
1. 廣韻上有兩種反切，一為時掌切，上聲，另一為時亮切，去聲，聲母都係禪。下也有兩種反切，一為胡雅切上聲，另一為胡駕切去聲。
2. 台華語上有兩音，一為陰上調，專指漢語聲調中平上去入之上聲，另一為ㄕㄤ去聲調，如上學、上班、街上、理論上。台華語下只有一音ㄒㄧㄚ去聲，如下班、下面、下不為例。
3. 台客語上下兩字都有三種聲調，其中突顯客語特色个最典型者，就聲母為次濁類者，客語多從陰上調轉成陰平調。上下兩字在韻都標為濁聲母禪類，其標為上聲者，客往往轉為陰平調。
四、客語上下兩字个多音現象
1. 上，竹客語音(shong)陰平調，苗客音song陰平調。如上班、上山。
竹客語音(shong)陰上調，苗客音song陰上調。如上泥、上蕃薯。
竹客語音(shong)陽去調，苗客音song陰去。如天上、路上。
2. 下，竹客語音(ha)陰平調，苗客(ha)陰平調。如樹下、屋下。
竹客語音(ha)陽去調，苗客(ha)陰去調，如天下、等一下。
竹客語音(ha陽去調，當虛詞用時，可加強語氣，轉成陰上調，像等一下兒、一下兒就毋見忒。
五、感想
漢字係單音節文字，故所一字多音，或者同音字盡多，係其特色，尤其係相關个漢語方言各自成系統，因此遇著台灣客語个用字問題，以及字音个討論，除了尊重次方言个實際語音，還係愛仔細分析比對，正有比較合理个結果。
