回想鄉音二十年
【文／鍾榮富／南臺科技大學應用英語系講座教授】
發音人：鍾榮富（南四縣腔）
「高雄市客家鄉音樂團」親像係自然生長个團體，事前並無周全个計畫，總係上了「客家語言同文化」个課程，大家都毋盼得分散，故所課程結束後，大家共下回想、懷念該段難忘个日仔。起初，這感情並無明確，後來透過交談、爭論、辯論、相詏，慢慢仔有了成立樂團个想法。記無得係哪儕，總係有人提出組團个建議，大家也無再想盡多，就恁樣自然共下哼哼唱唱，但求心中自在又安適，有童謠、山歌、各種樂曲，最後交織成一个樂團。
立案過後，正開始尋夢。當時各客家社團都有歌謠班，拿等錄音機，跈等錄音帶唱客家山歌。鄉音樂團對成立開始，就行專業路線，聘請大學教授來教唱歌个方法，請專業鋼琴來伴奏，請專家指揮，希望達到心目中个水準，愛分外人聽最好个客家歌曲，愛讓人了解客家歌有自家个風格、唱腔、曲律、語言，同歌曲个表達樣式。樂團還請專人寫歌詞、譜曲、創作新歌，心肚希望融合傳統同現代，讓團員唱出深埋心中个期望，果然樂團一開唱，分人耳目一新，掌聲對四面八方蜂擁以來，分樂團盡大个鼓勵。
𠊎等有自家个團旗、團徽、團歌，鄉音樂團係獨立自主个團體，依靠各方客家社團个襄助，有人介紹人才，有人推薦學者，有人出錢出力，實在讓人感動。經過不斷个洗禮、參賽、表演，𠊎等尋着樂團个靈魂，堅持未來个發展方向，對同聲合唱到多部重唱，樂團接受各種挑戰，接納各種建言，這就係鄉音樂團个基本精神。
帶着恁樣个光環，樂團開始南征北走，參加比賽，協助表演，只要就愛分享，同大家分享客家歌曲个優美。𠊎等去北部取經，同佢等共下快樂歡唱，目標就係愛融合南北客家个唱腔，最終就係帶等客家曲律分大家分享，𠊎等不在乎專利、不在乎研發結晶，只在乎客家歌曲个能見度、穿透度、分人愛聽个受賞度。二十年過去了，如今回首，𠊎等留下个腳印深透地泥，𠊎等个聲音到今下還留啊在聽眾个腦海中。但係人生短短，行過了，留下腳印，分後代傳承，這就係鄉音个職務。
交棒，係𠊎等必然愛做个準備，文化本旦就係一代接一代，代代傳承下去。𠊎等已經點了火，這紮火把愛燒幾久，愛傳幾代，毋係樂團做得決定个。
鄉音樂團行過全球有客家鄉親个所在，除了國內地區，山前山後，𠊎等還去了新加坡、印尼、馬來西亞、日本，同時𠊎等還接待來自各地方个客家社團，做了多方个交流，同各地樂團交換客家个歌聲。
行過鄉音二十年，𠊎等心中个理想、夢想、同客家文化傳承个關懷，多多少少都有了細細个成果，於今團員年紀大了，總愛將這個樂團交棒下去。一路行來，雖然風波不斷，困難重重，最後都解決了。𠊎等做个選擇，總講係一句話：愛分人快樂。
