Professor Vollman演講心得
【文／江卓安／中央大學客家語文碩士班】
假使你問，哪位做得看着客家人？𠊎會分你个答案就係：哪位都有客家人，不過係多還係少个問題定定。
今晡日芬芳先生邀請着Vollman先生來演講小眾語言个相關講座。分𠊎試着較心色个係，Professor Vollman係奧地利个學者，摎上隻月，也就係2022年11月邀請个學者：蔣永學先生。佢兩儕學者都係歐洲个學者，兩儕都係䟓䟓對歐洲過來臺灣个喔！實在無簡單喔。
演講个內容基本上係針對小眾語言，就係客家話，來去切入探討過討論， Vollman先生過摎恁仔个情形同歐洲个現下情況來做比較。𠊎試着較生趣个就係，一个文化愛來展現，就係透過語言，毋過現下因為社會个進步，人民緊遷徙，分恁仔个「小眾語言」在全世界「遍地開花」，客家話本來就係小眾了，現下又因為社會个種種原因，帶等自家个客話到新所在，又過較少講，漸漸忘本、毋曉得講母語个情形乜緊來緊輒常發生，實在得人驚。
分𠊎嚇着个係這場演講係全程都用英文來演講，有兜英文無盡好个同學，比論講：𠊎。就會聽个較食力，毋過聽著Vollman先生對於「異鄉人講个客家話」有厥个一個看法，恁樣就會試著今晡日个演講完全係值得个。
一個演講之間發生个小故事就係，先生佢毋會講華語，有時節都愛透過先生娘个翻譯。啊無就愛靠自家个「客式英文」來去問問題。演講中間突然講着圍頭話，毋過大家就毋之圍頭話係麼个，故所𠊎就用手機查了一下，發現圍頭話就係廣東話个一種，該片人安到「本地話」，就因為恁樣，大家又熟事了一種漢語方言，感謝google。
還有今晡日个演講係講摎社會語言來做結合个話，就係一種「高低語」个概念，假使一隻人係雙聲道个人，在厥个語言系統裡背，定著有語言分級系統，係等級越高个，就係越通用个，在臺灣，這可能就係華語（國語）係最高等級个語言，故所客家話自然就變成等級較低个語言。對𠊎來看，這「高低語」个情形在臺灣本島內就盡有感覺，因為自家本身就係客家人，又從細講客講到大，所以有時節看著共隻年齡个客人同學，佢兜在譫誃个時節都毋講客，會試著已壞過。
毋過愛分這種个小眾語言留下來个唯一辦法就係提高使用个頻率、機會，一旦一个語言、語音若係毋見忒，相信無幾十年後，可能這文化就會消淨淨了。
最尾，承蒙Vollman先生來中大客家學院來演講，分課堂个同學收穫盡多，勞瀝Vollman先生。
