夜市思情
【文／温育華／草漯國小教師】
發音人：温育華（海陸腔）
下畫六點過後，見擺就看着這位非常熱鬧，當多做生理个人，會𢱤等改裝過个兩輪車抑係貨車，帶等瓦斯爐這兜傢伙，來到自家个攤位擺東西，準備開始營業。
記得細細時節，阿爸時常會渡𠊎去逛夜市。該位个電火照着滿天光明，電火楯个蝶仔總係向等電火球捩捩轉無停，成時還會跌落菜盤肚，摎人客加料。行近擺攤會看着有兜人賣蕃薯、柿餅、鹹酸甜、四神湯、涼水、包粟、芋卵、楊桃汁……花樣盡多，像「阿婆个拖箱角—項項齊全。」緊行緊看成時還會鼻着一陣陣个香味，十分餳人食。
行到賣麵師傅旁脣，看著佢用雙手托起一垤麵團，用手出力拂麵團，續等左手拂正片拉，毋使幾下分鐘个時間，該麵團就變成幾千條又幼又長个麵條，麵條當幼，輕輕用手一捏，就像會捏斷忒，毋過，麵條又當有韌性，不管師傅仰般拉，乜毋會斷兩截。這下師傅用佢个雙手抓等麵條个兩片，輕輕一拂，手一鬆開來，麵條就跌落裝淰滾水个鑊肚，麵條在滾水肚，上上下下拋拋滾，就像銀蛇在該跳舞共樣，旁脣看个人都拍手，阿腦師傅个手藝還湛，該正識：「一身好手藝，較贏萬貫財。」
「又香又脆个花枝串，好食个花枝串……。」遠遠就聽着有人賣焙花枝，兩子爺遽遽行過去，看着一個頭那戴等老鼠色皮帽个中年男人，雙手擎等花枝串，在該喊「來哦！來哦！試食看啊!毋好食毋斯錢」，阿爸講：「六月牛眼─白咈哦！」
脣頭企等一個細人，緊拉厥姆个手，愛討花枝串來食。阿姆拗毋過細人，就摎頭家買一串，看佢食到笑弛弛，𠊎个口水強強會流出來，乜要求阿爸買兩串，一串分𠊎先拜五臟廟，一串分阿爸充飢，就恁樣一頭行一頭食，快樂一暗晡。
行過側角，遠遠就鼻着臭豆腐个味道，聽講臭豆腐係菜莖、菜葉摎豆腐共下發酵做个，毋知有影無？行着恁久想愛停下來歇一下，就在臭豆腐个攤位坐下來尞，喊兩盤臭豆腐，摎頭家娘講玻璃菜愛多放一息，還愛加兜辣醬，無辣毋好食。包尾，試著毋過願，再過喊加一碗豬紅湯，豬紅摎鹹菜共下煮到香香香，挾一垤燒熝熝个豬紅，牙齒一咬下去，該湯就直接在嘴肚噴啊出來，這就係𠊎從小到大最好食个客家味緒。
在夜市肚「話玲琅」个聲，變成夜市場盡特別个文化。這擺，在美國轉來，看着桌頂个鹹菜豬紅湯，就想著三十年前，跈阿爸遶夜市个情景。這下，阿爸過身咧！只好摎相思个目汁，化做永久个懷念，毋過，當時快樂个聲音，還在耳空肚捩無停。
