老頭擺人个病痛 ── 慢脾風
【文／彭欽清／國立政治大學退休教授】
發音人：彭欽清（四縣腔）
老古言語講：囥酒會紅，囥病會重。原在人較苦，又當會忍，有哪仔毋鬆爽，就忍下來，等到實在忍毋核了，正去分先生看。
連細孲仔有燒有冷，大人乜會拖得就拖，三懈怠四懈怠，好好个細孲仔嗄拖到壞壞，緊屙臭風屎，人日見日瘦，尾項就會屎胐頭尖尖，坐毋核，緊弄手指甲，這兜總下係慢脾風个症頭，holo 話講个“著猴”。
吾爸後生時節就看盡多藥書，自家又肯研究，照等藥書來合藥仔，斷症斷來已準，有幾帖藥仔救著已多人，尤其係慢脾風藥。佢自家有字簿仔會詳細記錄某人有某症頭，哪日開麼个藥方，食過後个反應，算起來真科學。
吾大舅無倈仔，吾二舅歇高雄旗山，降六個，第三個，kinjiang，幾個月仔就分大舅揇轉苗栗來畜，該下還係日本時代。聽吾姆講，大舅一屋下人就當惜kingjiang，毋過毋知係水土毋合無，飯下毋落，緊屙臭風瀉巴，人日見日瘦。
吾爸胚想怕係擔著慢脾風，喊吾姆煞煞去苗栗同細人仔揇轉泰安燒水个屋下，跈等自家去大湖漢藥店合藥仔炙分佢食。 吾姆講，kinjiang食了藥仔，屙个瀉巴還較臭風，害吾姊緊洗屎裙緊翻。等瀉到差毋多仔，吾爸正去合補个藥仔分佢食。
經過三、四隻月个調養，kinjiang食得落，開始作肉，也慢慢會同人搞，最尾正喊吾舅姆來揹轉苗栗。見大家有共下，吾大舅過舅姆會同kinjiang講：毋係若姑丈哦，你早就無命了。Kinjiang 大𠊎五、六歲仔，前幾年仔正過身。
吾姊民國四十四年結婚，厥大娘姊阿有姑歇在樹殼寮，已山肚，佢有一個倈仔擔著同kinjiang共樣个症頭，吾姊陪佢帶細孲仔來分吾爸看。吾爸看細人仔兩隻目珠中央鼻公峎項有青筋，手指甲揕落去無血色，一看就知係著著慢脾風。
吾爸就開藥單仔分阿有姑，喊佢去漢藥店拈，又拿一包灶心泥分佢，教佢炙藥仔該下放兜仔落去。灶心泥盡熱，係醫慢脾風盡好个藥引仔。
記得𠊎還細時節，見莊項有人家打新灶頭，愛搉忒老灶頭該下，吾爸就會帶等𠊎去拜託該人家同灶心泥分佢。分著个灶心泥佢老人家會細心細意个包起來，放在灶下棚仔頂，愛用著正拿下來。
阿有姑照等吾爸个話烳藥仔分厥倈仔食，幾個月仔過後就好了。民國五十七年，𠊎在大湖國中教一年，這個細孲仔堵好係國中第一屆，有分𠊎教著。下後佢在郵便局送信仔。吾姆講這細孲仔真曉得，幾下擺送信仔來遇著吾爸，會講：親家公，吾這條命係你拈轉來个哦。
