蔣永學老師──天海之間
【文、圖／江卓安／國立中央大學客家語文碩士班】
假使你問𠊎，客家个文學作品做得分人翻譯變做哪兜語言个作品呢？𠊎第一隻答案可能就係自家現下講个華語，正過來就係另外个一個本土語言：福佬話。毋過經過今晡日聽忒永學先生个演講以後，徹底改變了對翻譯客家文學作品个看法。
永學先生佢係德國人，所以佢就係摎臺灣个文學作品翻譯變做德國話、德國文，分𠊎試著已心色、已生趣。其實蔣先生來臺灣尞已多日了，佢乜去了客家電視臺分享佢个新作，安到：天海之間—臺灣文學選集。裡背肚有當多文章，都係蔣先生佢擇个臺灣文章。
其實會請著蔣先生來客家學院來演講，係因為渡臺悲歌這隻作品，蔣先生就摎菊芳系主任聯絡，正會有這機會同外國个漢學家交流。一開始發現係德國个學者來演講，心肝肚想：敢會全程都用德國話抑係用英文來演講。還好得先生係研究漢學个學者，佢个華語乜講來已好，完全毋會有聽毋識个情況出現。對𠊎來講，這場演講最特別个位所就係先生同大家紹介了教會羅馬字。這套拼音系統毋單淨係紀錄福佬話，乜有紀錄客家話个部分，毋過永學先生無紹介著，實在還打爽。
演講主題：《天海之間》這本書收集了早早對鄭成功在臺灣个時期个臺灣文人古典漢詩，乜有臺灣頭擺人个口說民間文學，好比講渡臺悲歌。蔣先生乜同大家講，佢無麼个了解客家話。永學先生看得清華語文字，毋過鬥共下就看毋識了。恁樣个情形還像𠊎自家讀英文，所有个字母都看得識，毋過鬥共下，有時節乜係像恩公食酒醉共樣，看毋出來。
蔣永學先生佢對於臺灣文化个愛實在還深，佢煞猛探看在臺灣這片土地上不同族群个語言同文學，為族群融合个臺灣文化寫落註腳。客家電視臺乜訪問了蔣先生，蔣先生乜講佢毋係漢學家，講佢係「臺學家」，這隻名稱可能還較適當。
最後，𠊎對於永學先生个演講收穫實在還多，永學先生佢對臺灣在地个文學、語言个熱情，這係值得大家學習个地方。
