中壢忠義祠探源（下）
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
毋過恁仔還係無法度解答做麼个會安到「大墓公」呢？又經過十過年，到民國107（2018）年个10月底，在新楊平社區大學舉辦「客家語言與生活文化研討會」項，有一個姓廖个發表人發表「從鬼到神：以中壢忠義祠的河南兵信仰為例」論文，引起熱烈个討論。有一個參加人士，安到張肇煥先生向論文發表人提出問題，正知講佢可能對大墓公當有了解。會後遽遽同佢請教有關个問題。佢講厥叔張鎮琳先生熟事大墓公个地主後人湯傳木先生。一時聽着，暢到毋知愛仰般講，煞煞拜託佢安排看做得去訪問湯先生無？好得湯先生無半點推辭。（圖4）
圖4 在張鎮琳先生屋下訪談湯傳木先生（左1湯傳木、左2徐貴榮、右2張肇煥、右1張鎮琳，2018.12.16攝）
湯先生八十大零歲吔！身體砸磳精神好。講：厥祖公來中壢石頭庄開墾異闊个土地，中壢後站一搭仔差毋多係湯屋个地，連石頭庄伯公祠用地又乜係湯屋捐出个地。五代以前有一個祖公，因爭發病仔當嚴重，哪仔就醫毋會好。聽人講三峽該搭仔个大墓公當靈，就去求神醫病，無想着轉來慢慢仔嗄好吔！為着愛報答神恩，就去分香割火轉來，在自家个田項立三粒石來拜，地點就在這下東興里活動中心較下兜仔。大墓公雖然係陰神，靈顯个消息慢慢仔傳出去，人聽講異靈就引起當多人拜。因為大墓公大部分就係年輕後生、身強力壯就死忒个單身羅漢，尤其係做特種行業个人，相賽來拜。人一多嗄踏壞田脣，無就跌落田肚，汶到一身潦潦，高不將就徙到這下个位所。到恁樣，正知這大墓公係湯姓人從三峽該片分香轉來拜个，毋過仰般又仰會係「義塚諸君」呢？
佢又講：「這大墓公本來無骨骸，當初想愛起伯公式个小祠，無想着起兩擺，到會落成欸就橫忒，經過評筊仔，大墓公正同意起過『風水式』个，同三峽該片个共樣，碑石主神就係「義塚大墓公」。光緒21（1895、乙未）年6月，日本人愛侵佔臺灣，中壢、平鎮這搭仔發生『河南兵事件』過後，祖公湯阿秀同意捐地，好埋葬這兜河南兵个身屍，做兜仔善事。到明治31（1898）年做風水个時節，就同大墓公合落去，還有無名屍骨个萬善爺也合葬，碑石安名『義塚諸君之墓』」。
問湯先生有去過三峽該搭仔个大墓公無？佢講無！張先生就上網查詢，結果三峽並無大墓公，發現湯先生講个大墓公就係位在三峽邊脣个土城，就跈等安排來去看一輪啊！果然毋會差，土城這間大墓公主神就係「擺接十三庄義塚大墓公」（圖5），簡稱「義塚大墓公」（圖6）。到這，答案就當明白吔！
圖5 位在新北市土城區忠義路61號个「土城、板橋、中和 乾隆詔賜擺接十三庄義塚大墓公」（2019.01.20攝）
圖6 「擺接十三庄義塚大墓公」簡稱「義塚大墓公」（2019.01.20攝）
到這下，中壢忠義祠，人還係喊佢「大墓公」，原來係湯屋人在清朝去土城這間「大墓公」割香轉來拜个，本來就安到「義塚」吔！毋係加葬河南兵正安到「義塚」个，只不過加葬河南兵過後，主神變到「河南兵」咧！起廟安名，中壢街庄信士安佢「忠義祠」，毋管係對原來个大墓公，抑係後來个河南兵，人老為大，係一種尊榮！（全文完）
※本文的「着」，同教育部訂的「著」之意。
