好人毋長壽 禍害一千年
【圖／廖千慧；文／何石松】
發音人：何石松（海陸腔）
「好人毋長壽，禍害一千年」，係講世上儘多好人介壽年無長，後生搖搖就來過身，倒轉該兜惡心腸介壞人，嗄當長命，還無良心啊！這係一般人對好人無辦法長壽，壞人享盡富貴，一種同情介痛惜摎無奈何介怨嘆！也有人安到禍害，無意無思，八仙就添八百歲分佢，就係禍害一千年，實在好到無天理。
仰般安到禍害一千年？原來該禍害，係一隻人名忒斯。聽講頭擺有個周公，當會卜卦算命，算一擺一兩銀，算錯還你十兩銀。有一個老阿婆，厥徠仔做生理當久無轉，去問周公。算著係：「若徠仔毋會轉咧，會死在半路上。」老阿婆驚到會死，就去拜託桃花女救命。桃花女講毋會錯，又看著佢恁衰過介拜託，就答應佢，結果，正經救咧厥徠仔介命。周公屋下，有一個人，安到禍害，80歲咧。看著周公逐日摎人算命，也請佢摎佢算，無想著一算，「哎呀！壞咧，你斯能夠食加半個月定定，這半個月，你好好去尞，毋使去做事！」
禍害也知，人有生就有死，該係「斷腳老鼠――難上樑(商量)」介，不過，佢還想愛食加幾年，佢知桃花女當慶，就擐兜等路去拜託桃花女救命。因為佢兜係親戚關係，厥爸又講救佢性命毋係做好事乜，加上禍害介纏纏滴滴，桃花女斯答應咧！桃花女喊佢：韶暗晡你在路口該座廟，準備一張桌席，愛擐七斤零介雄雞，壙在桌下。等到二更天時節，八仙就會在該經過，八仙好食酒，看著酒菜，佢兜就會食，該下，你就喊佢摎你添壽，佢係毋肯，你就敲雞頭。
果然，第二暗晡，禍害準備了當豐沛介桌席，愛請八仙，八仙看著當暢，坐下來就飲酒作樂，縈拳行令。食到酊昏飽醉介時節，禍害就恬恬行出來，拜託八仙摎佢添壽。八仙斯講：「你都會死介人咧，還添麼介壽？」禍害就拿雙箸向雞頭敲一下，敲到八仙頭那昏昏，無結無煞。禍害又喊八仙添壽，無奈何，八仙斯一儕添一百歲分佢，加上原來介80歲，佢就食到880歲，差不多一千歲咧，難怪佢逐日都當沙鼻在該咥咥滾講：「人講𠊎老𠊎還吂，今年正食八百零；閻王搭信同𠊎講，分𠊎禍害自由行。」所以安到：「禍害一千年。」
該好人又仰般毋長壽呢？正經，像該孔子最得意介學生仔顏淵，32歲就死忒，㓾人毋眨眼介盜跖，嗄食到當長命；甘羅12歲斯能拜相，14歲就分人害死；三國時，注解《道德經》非常有名介王弼，青春年華介23歲就過身；建安七子之一，45歲介孔融，摎中國古代四大名醫，63歲介華佗，雖然這兩個，比該兜年齡有較大，但是，比起害死佢介曹操，還係好人毋長壽，因為，曹操食到65歲正死；唐朝14歲就寫出千古名文〈滕王閣序〉介王勃，後來當毋順利，食到28歲就死忒，像這恁多介人才，正經係好人毋長壽啊！係講佢兜無早死，後來情況可能無共樣。
在台灣來講，愛鄉愛土介義民，雖然來自各地，但是，佢兜犧牲介年齡，儘多都當後生，1895桃竹苗乙未抗日犧牲介，姜紹祖正19歲，吳湯興摎徐驤，共樣35歲，其他一千擔壯烈就義介都係後生人，佢兜不過20歲定定；龍潭七十三公忠義廟所祭拜介犧牲義軍，死亡年齡無超過30歲，佢兜介遺族，為了避免無謂介犧牲，逃亡到山肚原住民介所在，驚怕分原住民摎日本兵發現，嬰兒噭介時節，嗄發生儘多介不幸，正經係好人毋長壽，該兜做積惡介，禍害一千年啊！
其實，還有千千萬萬介好人毋長壽！看該秦朝大將白起，為了分皇太后轉外家，開條河壩生生摎20萬百姓浸死，西楚霸王對該投降介20萬大軍，全部生埋；恁久以來，著著新冠肺炎介死亡人數，到111年12月底為止，全球有600零萬儕死忒，台灣也有15000零儕死亡；俄羅摎烏克蘭戰爭，兩國合起來也有26萬人死忒。死者為尊，吾俚愛摎該兜毋係自然死亡介人當做好人正好，所謂好人毋長壽，該兜發動戰爭介人，還在該像笑面虎樣，在該呵龍咄虎，禍害人間，實在無天理。
可見好人毋長壽，雖然有當多原因，一等重要使人敬佩介係，這兜好人，係為了正義，全民介愛心，民族介大義，犧牲自家，留下義烈千秋，所謂「孔曰成仁，孟曰取義」「朝聞道，夕死可矣」介精神，實在毋係好人毋長壽，係好人在該發揚浩然正氣，使得「地維賴以立，天柱賴以尊」「當其貫日月，生死安足論」，正經係客家犧牲介忠義精神！正會試著好人毋長壽啊。
所以，好人毋長壽，所造成介損失禍害，係算毋著介，正會講「好人毋長壽，禍害一千年。」
※本文的「介」為大眾通用的「的」，同教育部訂的「个」之意。
