噭等出世
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
崖毋知崖做麼个愛出世？
正出世，崖就試著自家出差世。
做麼个會出差世？
定著係崖前世無修。
前世無修，手拘腳又羞。
識聽吾姆講，崖出世開始，日日噭。
有奶食也噭，無奶食也噭，
日頭出也噭，落雨天也噭。
聽講該就安到百日噭。
聽吾姆講，崖出世該下，係姨婆同崖斷臍。
胞衣就埋在間項該窗仔下。
過五年老弟出世嘎下，
來毋掣喊產婆，吾姆係自家拿剪刀同老弟斷臍。
老弟出世崖五歲欸，毋過阿姆斷臍个事情，
崖也記無已清楚，
這下老欸想倒轉去，
算來阿姆降老弟，強強會暈忒咧，
係仰仔剪臍？仰仔打結？仰仔朗燥肚臍頖？
阿姆哀！冤枉正得！正經係出差世个阿姆。
阿姆降崖五姊妹，
阿姊阿哥崖，三儕都三座屋出世，
兩个老弟搬到竹圍仔正出世。
堵堵崖做對歲該年，阿爸兄弟分家，
阿姆㧡一擔籃仔，一頭放盆頭茶罐碗筷，
一頭放正愛學行个崖，
阿姊阿哥𢯭拿兜仔東西，慢慢仔跈在屎背尾，
直直行到樟樹林竹圍仔九十三號，
足足行忒兩點鐘，正來到雙峰山腳下个新屋寮。
歇在竹圍，阿爸係家長，
有人請做事，就出去打零工，
無零工做，就摸田項事，蒔禾、種番薯、芋仔、薑嫲，
無就無閒屋下畜个豬、羊、狗、貓，雞、鴨、鵝、火雞、兔仔。
阿姆除忒三餐菜飯，就係菜園田尾，甜菜、香菜、蒜蔥、芫荽、𧊅絲，
算毋揫个菜類，做毋忒个田事，
阿姆个世界，就係這兜樵杈、草結、蘿蔔、鹹淡。
還細戆當戆當，食粳、食水粄、食飯、食粥、食番薯、食芋仔，
過年過節，隔壁鄰舍，相招相報，鬥股偷㓾豬，
正有豬雞鴨肉好食。
屋下肉菜毋罅，跈阿哥阿姊摘野果野菜，現摘現食，
收蜂竇雕卵，捉筍蟲、吊竹雞、戽蝦公、捉湖鳅、撳蛤蟆、覓蜆仔，
帶轉灶下，炊烤煎炸，填補飢餓。
嘆我爺哀，唸我姊弟，天地無良，困頓生靈。
光復初時，壞亂吂修，百業停拖，食睡難安。
該隻時代，該種生活，細子幼女，家家難畜，
人講無餓死就已會了，還敢講麼个？
有屋好抵風抵雨就已好，還敢求麼个？
該種世界，做爺哀个心肚噭，做子女个嘴角翹，
老年轉想，哀切難忍。
這就係，崖這代人个前世無修，
故所崖會，
噭等出世。
※本文的「崖」同教育部訂的「𠊎」之意。
