中央大學電子報

歸轉台灣

【文、圖／鍾榮富／南臺科技大學應用英語系講座教授】

　　九月初，校園个樹葉慢慢呢變色了，再度去校園行一轉，看看這，看看該，突然愛離開這出入三年个校園，心中有一種講毋出來个感傷。原來這就係留學生涯，同頭擺書項讀着个經驗，蓋無共樣。𠊎坐啊在文學院頭前个大石像之下，緊愐一路以來个過程，親像無半息係𠊎捉得着个。對食麵開始，昏昏戇戇，吾个命運就恁仔來到香檳。匆匆忙忙，三年就過忒了，還無想着愛仰仔打算，就愛歸台灣教書了。

　　伊利諾大學个校園，比起美國優美个華盛頓大學、康奈爾大學，少了高高低低个起伏，少了上崎下崎个彎曲。比起哈佛、普林斯頓个校園，少了湖水瀲灩个婉約，也少了紅磚古屋个典雅。毋過香檳个校區有簡樸、恬靜个氣氛，還有同社區生活互相依靠、互相映照个日常。香檳个圖書館資料豐富，館藏各種文獻、圖書、經典，還有珍藏个善本書。這三年，𠊎在圖書館地下二樓个私人書房(cells)，讀書、發夢、發譴，也有孤獨，也有激動。

　　就在九月初，𠊎同家人帶等簡單个行李離開香檳。小飛機對機場升空个時節，𠊎還對窗仔再看一擺校園，校園緊來緊細，最尾麼个都看毋着了。就恁仔，告別了三年个留學生涯。第二日，歸到屏東屋下，開始另一階段个忙碌生活。

　　歸啊來，本想愛好好做音韻學个研究，為當時个研究打開另一个領域。頭擺台灣个語言學變哪做句法學，因為該下仔語言學都係講究句法。愛開發一個新个領域，並無恁簡單，故所𠊎僕僕風塵，南北奔波，只要有研討會，𠊎定著會去行銷音韻學。在恁仔个場所之下，𠊎入了教育部个「國語推行委員會」，又分本土語言推行者請去執行注音符號同羅馬拼音个製作。做得講，歸轉台灣最早个三年就在理論同實務之間徘迴，難得停下腳步好好思考音韻學个未來。

　　1995年，𠊎申請國科會海外研究个經費，來到麻省理工學院(MIT)做一年个研究訪問，主要係𠊎在香檳个恩師Kenstowicz教授轉去該教書，希望𠊎去同佢幫忙。佢該下在主編Studies in Language and Linguistic Theory，需要助手。去到MIT，當然愛去聽N. Chomsky同Morris Halle个課，佢等兩儕係現代語言學个開路先鋒，上起課來，分人啟示當多。這種自由討論、開放不同看法个教法，實在讓人開眼界。可以講，每節課，先生講个還無學生仔問个恁多。最重要个，到尾都回轉歸本題，集中焦點，這種教法影響𠊎盡大。

　　在MIT，做事、聽課、讀論文之外，𠊎開筆寫升等論文。一有問題，就去尋Morris問，每一擺入厥研究室，至少都愛聊點過鐘。對研究室出來，往往有種新个想法。