文學之旅
【圖／文 中央大學客家語文碩士班 江卓安】
文學个本質係麼个？𠊎自家對文學个定義可能就係自家對於生活个感覺，用文字去表達出來，在九合一大選个第二日，客家系舉辦了文學之旅，去个位所都在新竹。
第一站，就係來到了最近最多人討論个客家電視劇：《茶金》个故事地點，就係北埔老街裡背肚个姜阿新洋樓。愛去這洋樓參觀斯無恁該呢！這愛提前注文正做得入去參觀，該日有盡多人想愛入去看都入毋得去，去到該裡背肚就做得鼻着一陣陣个樹材香味，該係ひのき个味道，這場演講講了姜阿新家族个故事，乜講了這間姜阿新洋樓係在佢破產个時節賣忒个，現下係姜屋个後代人來摎這間洋樓買轉去个，除忒知得房屋裡背个歷史外，𠊎乜買了一本書，安到《茶金歲月》，這本書就係講正經个歷史了，毋係像電視劇裡背演个了，𠊎乜希望自家以後乜有時間做得正過好好來看一擺《茶金》，來尋看啊在戲劇裡背摎書本个歷史記載有麼个毋共款个位所。
第二站就行尞過北埔老街到了龍瑛宗文學館，裡背對龍瑛宗先生佢一生个紹介有盡多，還有厥文學作品个內容分析，在這聽个演講乜係分大家對龍瑛宗先生這隻作家有了過較多个了解，還有該裡背个工作人員分𠊎一大堆个明信片，一儕人一張，有龍瑛宗文學館个封面，還過木瓜樹个明信片兩種版本，結果木瓜嗄「滯銷」，實在笑死人。
最尾个一站嗄對北埔駛到了新埔个陳家農場，陳家農場係一間當有客家特色个農場，陳新源先生摎𠊎兜紹介，佢係仰般來同政府合作來摎農場个經營做結合，係仰般摎客家个文化來摎農場經營做融合，做出一个永續經營還過傳承文化个一個特色，這恁樣个經營模式其實摎現下企業輒常講个ESG(環境保護、社會責任、公司治理)，還過聯合國永續發展目標講个十七項大目標都有關係，分大家學習着个毋單淨係去聽陳先生講話定定，過較多个係分大自家深入去想，客家愛仰般同現下个企業管理，還過永續發展來做結合，仰般去發展，去發揚客家，這就係𠊎兜愛繼續關心个課題。
文學个旅行毋單淨講个係文字小說，除忒這以外个，講个就係客家个生活。
