六龜堵著南北客(上)
【圖／文／鍾孝昇／桃園市中壢區龍岡國小教師】
發音人：邱新春（四縣腔）
參加登山隊三日兩夜南橫个旅行，因為最尾一日臨時有事情，高不將在第二日打早，就辭別大家，一儕人從六龜轉桃園去。毋過「因禍得福」，無想着這落單个歸程，嗄變作𠊎發現六龜原來係客家庄个奇妙旅行。
對飯店坐轉運車，行過荖濃溪，黏時𠊎就到六龜市區了。六龜區位在高雄市中央偏東个位所，係高屏平原摎中央山脈之間个山排，六龜市區大約就在山排个中央。
六龜地名个由來，有異多个講法。有人講係因為荖濃溪有六大垤石牯當像龜仔，故所安到六龜。乜有人講係附近个山頭看起來就像六隻龜仔，故所起了這隻名。毋過，根據學者个研究，「六龜」兩字應該係由平埔族語「六龜里」(lakuli)个發音轉過來个。在六龜市區行尞，𠊎發現鬧熱个街路雖然無幾條，人乜無幾多，毋過還係有兩三个老人家，佢兜兜等凳仔，就在店門口个門碫下打嘴鼓，生活過着當恬靜。過認真聽起來，𠊎又發現佢兜講个話，原來係摎𠊎共樣个北四縣腔、還有海陸腔，這摎𠊎想个實在毋共樣。𠊎試着六龜這位偎山，應該係講原住民話正著。就算係講客語，因為六龜邊脣就係美濃，乜應該係講南四縣正著，搣到𠊎無頭無䌈。
包尾在「六龜老街區」个光復路，相借問老人家，𠊎正知六龜市區這位有當多人个阿公、阿爸係日本時代，從桃園、新竹、苗栗搬過來个客家人，佢兜毋係講北四縣，就係講海陸。六龜南片摎美濃、屏東合界个新寮、新威、新興三隻村，正係講南四縣腔个客家莊。六龜，做得講，摎全台灣各地个客家人攞攞合合共下。
(荖濃溪河床項个「龜王岩」，這係六龜地名个由來)
根據林秀昭先生个研究，日本時代中期，因爭北部个樟腦樹，緊來緊少，有異多當會採樟焗腦个腦丁，高不將徙到中南部个山區。這兜腦丁大部分係客家人，故所，在嘉義縣中埔、大埔，台南市楠西，摎高雄市甲仙、六龜等地，乜做得看着北部客家人起个莊頭。林秀昭先生指出光復過後，台灣樟腦產業就漸漸沒落，伸下大約十分之一定定，這兜來六龜食頭路个北部客家人，大部分就留在這絡食。佢兜有人開店，有人耕田，還有異多人食公家頭路，故所鄉公所早期大部分都係客家人，佢兜算起來係六龜這生活過較好个族群。
行在老街區，一間老式个木造屋就在面前，這係高雄客運六龜總站，乜係這下高雄客運唯一保持原貌，歷史最久个車頭。車頭原名係「池田屋」，在日治時期起建，係該央時日本軍警个招待所，後來經過幾手，正分高雄客運買走。兩三年前，修整成保存文物个園區，除忒見證六龜在日本時期樟腦、林業个發展，也見證了客家先民開墾六龜个歷史。
不過，北部客人帶來个語言、文化，今這下就像「老街區」共樣，漸漸搣忒。在這位，聽無着後生人用客話當作生活个語言，𠊎想這應該係因為佢兜人數較少，四圍又都係福佬人，為了生活高不將愛用學老話，今這下嗄變到講學老話个「客底」。𠊎企在店門前，看著退色爛忒个「𠊎講客」貼紙，心肝肚有兜仔盡毋盼得。
離開「六龜老街區」，順等「河邊巷」𠊎行去聽講摎六龜地名有相關个「龜王岩」，堵好就在河壩脣，看着這當大个「龜王岩」。民間相傳，六龜大橋底下个荖濃溪河床中，有六座岩石散落於溪中，遠遠看就像六隻龜仔，大家摎這最大个石牯安到「龜王岩」，還在旁脣起一間廟，供奉著一尊石龜像。𠊎對河壩脣望向六龜大橋，用想像力同視力，想愛尋河壩肚另外五隻龜仔。毋過，河灞修整工程摎洚洚滾个河壩水，打亂忒𠊎个各種感覺，雖然係恁樣，𠊎還係相信這龜王所帶領个大軍，定著會守在荖濃溪脣，毋單淨保護著居民个安全，也保護著六龜客家文化个傳承。
坐上客運，嗄下來𠊎離開六龜市區，準備去到幾公里外，另一隻客家文化既今還保持著當好个客家莊頭：「新民庄」。
(六龜大橋脣个「河邊巷」，順利鐵店還係保留著頭擺先民个傳統打鐵个方式，見證六龜林業摎樟腦个開發)
