老頭擺人个病痛──痰火、疔仔、臭頭，蛾仔
【文、圖／彭欽清／國立政治大學退休教授】
發音人：彭欽清（四縣腔）
人食五穀雜糧，難免會有麼个病痛。今這下醫學發達，當多原在个病，毋係較少就係總下無忒了。
還細該下，盡驚講鄰舍有人著着痰火，大人會喊細孲仔毋好行兼佢，無會遰著。吾姆還講佢識聽人講過，暗晡頭大門、窗仔無關好，痰火會走入來，鑽到人个圓身項來遰人。
記得莊項有個阿連伯，屋下盡大耕種，人當瘦，總係緊嗽，吾姆講佢擔著痰火，好得有錢，蔘仔養等，係無早就無在了。食到七十零正過身，厥屋下人同佢用過个東西總下拿來燒淨淨，連已值錢个羊羔毛大襖乜共樣。
𠊎小學、初中、高中總下全勤。小學時節，有一年發疔仔，幾下日毋會行，愛吾姆背𠊎去學校。該下人當會發疒才發癤，發疔仔就盡費氣，會腫會發紅，係生在屎胐項，連坐就無法。
疔仔還細粒該下係煞煞膏藥仔會消忒，係無會貢膿，該就愛貼較大垤个膏藥來吊膿。膏藥愛先焙軟來，貼幾日仔，疔仔會變軟，差毋多仔，就做得同膏藥擘起來撳膿，係好彩膿頭會跈膏藥出來，係無，愛用雙條線定定仔同膿頭絞起來，膿頭係大絞起來該下還會“哱”聲仔。
該下仔个細人仔，尤其係細倈仔，一隻半隻會發臭頭，毋係大病，毋過乜難耐，嚴重个歸大搭仔頭那毛會㪐忒，毋會再過生。吾小學班項有一個發臭頭个，厥頭那頂貢膿貢膿，烏蠅拑烏蠅啄，先生就會同同學講，大家愛注意衛生，下課就喊這個同學去辦公室搽藥仔。
做戲个有講明朝个開國皇帝還細該下乜發臭頭，故所安到臭頭皇帝，毋過同學看著這個同學發臭頭恁得人驚，逐儕就講甘願做百姓，無愛做皇帝。
小學三、四年級邊仔，𠊎有一擺緊作燒，人暈暈，食藥包仔个退燒藥仔無效，吾爸喊吾姆帶𠊎去下街分漢醫賴先生看。佢同𠊎打脈過後，喊𠊎嘴擘開來，一看吾喉嗹胲肚頂中仔脣項一點白白，就斷講係發蛾仔，跈等合一包蛾仔散，教吾姆愛仰仔用。
轉到屋，吾姆取一截細竹管仔，一頭塞兜仔蛾仔散，一頭佢含在嘴項，對準吾嘴肚个88蛾仔歕落去，一日歕三到， 無幾日仔就好了。
老人家講个：有屎愛屙，有病莫拖。人有哪毋華麗，這下健保恁利便，就愛煞煞去分先生看，係無細病會變到大病，該就會當費氣。
